Hosea 7 - O Debleskro Lab 2024 (Sinte-Manouche)

¹ Hako kopo, kay kamau mire menshenge lauter pale mishto te krell, palle sikrell pes, havi doosh o Efrayim ap peste anas, oun har baro o čilačepen kol menshendar an o foro Samaria hi. Yon hi rhorhepangre. Čorepangre phagenn an i khera dren. Oun randepangre čorenn i menshen vin ap o drom.

² Oun kova djal gar an lengro shero dren, te djinau me lengro tselo čilačepen. Lengro čilačo koova hi troul lende trouyel, oun hi mange tardo glan mire yaka.

Phoukepangre marenn o baro rayes

³ Pengro čilačepah krenn le o baro rayes barhtelo, oun pengro rhorhepah i pralstunen.

⁴ Yon halauter hi phoukepangre. Lengri rholi rhačell har i yag an i bob, hoy hi yaake tato, te hounte dell o pekepaskro bouder gar yak koy pre, yaake rah har krell lo o maro, hoy kamell lo te pekell.

⁵ Ap maro baro rayeskro dives piyenn pen i pralstoune mates i molyatar. Oun o baro ray beshell pes khetne kolentsa, kay san pral halauter.

⁶ An ko tsiro, kay lenn le penge čilačo koova glan, hi lengro dji tato har i bob. I tseli rati sovell lengri rholi, taysarlake rhačell li pre har i bari yag.

⁷ Halauter lendar rhačenn i rholyatar har i bob. Yon marenn pengre čačepaskre rayen. Lengre bare raya perenn yek pal o vavar. Oun kek lendar dell pal mande gole.

I vavar themma venn gar i Israelenge ap i rig

⁸ O them Efrayim djal khetne vavar thementsa. O Efrayim hi har i paash-pekedi merkli, hoy vas gar trouyel rissedo.

⁹ I vavar menshe rhan leskri zoor, oun yob hayvell kova gar. O Efrayim hi har i phouro morsh, koleskre balla parno van. Oun yob hayvell gar, kay leskro tsiro sik trouyel hi.

¹⁰ I Israelengre pre-phourde djia sikrenn, har boud doosh ap lende hi. Ninna te hi kova yaake, venn le gar pale pash mande, lengro baro Debleste, oun rodenn man gar.

¹¹ O Efrayim hi har i dineli tauba, kay moukell pes sik te kharell. Ap yek dives kharell lo i Egiptaryen, te venn le leske ap i rig, o vavar dives nashell lo an o them Assour.

¹² Te krenn i menshe an o them Efrayim yaake doureder, vitsrau me miri netsa pral lende, oun taprau len har čirkle, oun dau len pengri phagi, yaake har lenge penom, har yon khetne his.

¹³ Bibarht ap lende! Yon djan mandar krik! Merepen pral lende! Yon peran mandar tele! Me kamoms len dran i bibarht te lell, oun yon rakrenn rhorhepen pral mande.

¹⁴ Te denn le gole ap mande, vell kova gar dran lengro dji. Čiddo hi le ap pengro čiben oun rovenna zoreles, oun činenn pen ratles, te vell len djob oun mool. Ap mande shounenn le gar.

¹⁵ Me homs lengro sikepaskro oun krom len zoreles. Oun len hi čilačepen an o dji, hoy kamenn le mange te krell.

¹⁶ Yon rissrenn pash i debleste, koles kek zoor hi. Yon hi har i bango bogo, koleha kek faylo kote djal, kay te djal lo. Lengre pralstoune hi bare mouyengre. Doleske venn le maredo o rhareha. Palle san i Egiptarya pral lende.