Hosea 3 - O Debleskro Lab 2024 (Sinte-Manouche)I Israelitarya venn pale pash pengro baro Debleste 1 Oun o baro Devel penas pale ap mande: “Dja, oun sike i djouvyake har kameh lat, savi djouvyake, kay nashell vavar morshenge palla, ninna te kamell lat lakro pirno. Yaake sikrau me, o baro Devel, i Israelitaryen, te kamau len, ninna te nashenn le vavar deblenge palla oun kamenn kol drakengre merklia, hoy le lenge anenn.” 2 Kote ginom lat mange oun playsrom 15 (deesh-te-panč) roupene kotya oun 330 (triin-sheel-te-triyanda) litarya djob. 3 Oun me penom ap late: “Tou ačess pash mande i rah tsiro, oun loubress tout gar trouyel, oun sovess gar vavar morshentsa. Oun an kava tsiro kamau me vitar gar touha te sovell.” 4 Yaake djal i Israelenge: I rah tsiro hi len kek ray oun kek pralstoune pral pende, oun yon anenn kek firhen o Debleske an leskro kheer. Len hi bouder kek pre-čidde barra, kek rashayeskri damdira oun kek khereskre debla, te poučenn le lendar, hoy te krenn. 5 Pal ko tsiro venn i Israelitarya palpale pash o baro Debleste, kay lengro Devel hi, oun pash lengro baro rayeste – yekeste dran o kheer David. Oun trisslepah venn le pash o baro Debleste. Oun yob vell lenge lačes an ko tsiro, hoy vella. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.