Hosea 2 - O Debleskro Lab 2024 (Sinte-Manouche)

I lačo tsiro vella

¹ Oun i Israelitarya venn yaake boud har i santa pash o baro pani hi. Kek nay penella, har boud kote čiddo hi. His i tsiro, kay penas o Devel ap lende: “T'mer han gar mire menshe.” Palle vell i tsiro, kay ap lende penlo vell: “T'mer čave o djido Deblestar!”

² Palle venn i menshe dran o them Youda oun i menshe dran o them Israel khetne. Oun khetne rodenn le penge yek pralstounes vin, te vell lo o ray pral lende. Oun yon djivenna an o tselo them. Havo baro dives vell ko dives, kay djal yaake, har o lab Yesreel kharell!

³ Penenn t'mare phralenge, te hi le mire menshe, oun ap t'mare phenya, te krau me miro dji lenge pre.

O them Israel hi har i loubni

⁴ O baro Devel penell: Penenn, havi doosh o them Israel ap peste anas! O them Israel, t'mari day, hi bouder gar miri romni, oun me hom bouder gar lakro rom. Mangenn latar, te lell li kova krik, hoy sikrell, te hi li i loubni, – ko koova an lakro mouy oun kova, hoy hidjrell li ap peskri beč.

⁵ Te krell li kova gar, palle rivau lat vin, te hi li nanges čiddo, har ap ko dives, kay li boldo vas. Oun krau, te vell o them i moulo them, kay kek pani hi, kay hounte merell li i troushatar.

⁶ Lakre čave hi i loubyengre čave. Lenge krau miro dji gar pre.

⁷ Lengri day nashas vavar morshenge palla, oun anas ladj ap peste. Yoy penas peske: “Me kamau mire pirnenge palla te nashell: Yon denn man, hoy man hounte vell djipaske: Maro oun pani, bakrengre balla oun layntikre thaba, djet oun mool.”

⁸ Doleske čivau soubyengre bourra ap lakro drom oun krau i massouri, te nay hatsell li peskro drom gar.

⁹ Oun te nashell li peskre pirnenge palla, oun nay lell len gar dren, oun te rodell li pal lende, oun nay hatsell len gar, palle penell li: “Me kamau pale pash miro ersto romeste te djal. An ko tsiro djas mange feteder har kanna.”

¹⁰ Yoy kamas gar te hayvell, kay me homs kova, kay dom lat djob, mool oun djet, ninna boud roup oun sonakay. Oun kova das li o moulo debleske, o Baal.

¹¹ Doleske kamau miro djob oun mire drake pale te lell an ko tsiro, kay le baro van, oun dren anlo vans. Ninna lau latar mire bakrengre balla, oun miro layntikre thaba lakre ripyenge.

¹² Glan lakre pirnengre yaka rivau lat nanges vin. Oun kek nay lell lat dran miro vast vin.

¹³ Me krau, te venn i Israelitarya bouder gar barhteles khetne ap kol bare divessa. Ap kek Debleskro dives, ap kek dives, kay vell o nevo čon diklo, oun ap kek vavar baro dives venn le bouder khetne.

¹⁴ Me krau lakre drakengre rouka paash, ninna lakre faygetikre rouka, kolendar yoy penas: “Kolentsa playsran man mire pirne.” Me krau i divyo veesh dran lende. Oun kol roukengre, hoy pral ačenn, rhan i divye firhe.

¹⁵ Me dau lat i phagi hako diveske, kay nashas li peskre pirnenge palla, kol rhorhene deblenge, oun rhačras soungepaskro koova lenge, oun čivas kanengre oun verklia ap peste; te krell li pes shoukar lenge. Oun man bistras li! Kova penell o baro Devel.

O baro Devel vell lake pale ap i rig

¹⁶ Doleske dik, me kamau lat te tserdell, oun kamau lat an o moulo tato them te anell. Oun kote rakrau kamles lah.

¹⁷ Kote dau late pale lakro drakengro them, oun koy tala Akor vell lake har i baro voudar, pal koleste lake o kham pre djal. Oun kote nashell li pale kamles pal mande, har an ko tsiro, kay li terno his, har an ko tsiro, kay li dran o them Egiptia djas.

¹⁸ Palle, penell o baro Devel, kharell li man pale miro rom, oun gar bouder miro Baal.

¹⁹ Oun me krau, te lell li o lab Baal bouder gar an o mouy. Hako tsireske venn i laba kol rhorhene deblendar bistedo.

²⁰ An ko tsiro krau i divye firhentsa, i čirklentsa oun i sapentsa vin, te krenn le lake kek čilačepen. Me phagau o tselo kourepaskro koova paash, i boge oun i rhare an o them. Oun moukau len kek daryah kote te djivell.

²¹ Israel, tou veh miri romni hako tsireske. Me djau touha trouyel, har mishto oun čačo hi. Me hom lačes ap toute, oun krau miro dji pre touke.

²² Me ačau hako tsiro pash toute. Oun tou prindjreh man, o baro Debles.

²³ An ko tsiro, penell o baro Devel, kamau te shounell: Me shounau, hoy o bolepen mandar mangell, oun o bolepen shounell, hoy i phoub lestar mangell.

²⁴ Oun i phoub shounell, hoy o djob, i drake, oun i djeteskre rouka latar mangenn. Oun yon shounenn, hoy o Yesreel lendar mangell.

²⁵ Oun me anau i Israelitaryen pale an o them, te venn le kote i bari natsyona. Oun man hi pale i dji lenge, kay kharedo van: Les hi kek dji lenge. Oun ap kolende, kay kharedo van: Gar mire menshe penau palle: Mire menshe. Oun yon penenna: Miro Devel.