Hosea 13 - O Debleskro Lab 2024 (Sinte-Manouche)O Debleskri rholi vell pral o Efrayim 1 His i tsiro, koy trissan i menshe, te rakras o Efrayim. Yaake an-diklo his lo an o them Israel. Palle vas i tsiro, koy djas lo o Debleskro dromestar tele, oun moukas pes o debleha Baal dren. Kova his leskro merepen. 2 Oun kanna krell o kheer Efrayim boudeder čilačo koova: Dran pengro roup krenn le penge figure, hoy vi-dikenn, har yon kamenn, oun hoy le an-mangenn. Morsha, kay lengri boudi mishto hayvenn, krenn len pengre vastentsa. I menshenge vell penlo: Koon anell čomone o Debleske, hounte čoumrell kal roupene terne groumyen! 3 Doleske hi le har i folka, hoy taysarlakro sik krik djal, oun har ko pani, hoy ap o zenlepen hi, oun sik bouder gar koy hi. Ava, har o phouss hi le, hoy vell dran i platsa vin phourdedo, kay o djob vin dino vas, oun har i yagakro dourho, hoy tserdell dran i vorhni vin. 4 Me o baro Devel, hom tiro Devel, foun ko tsiro, kay anom tout dran o them Egiptia vin. Tou te prindjress kek vavar debles har man, Oun kek vavar nay lell tout dran o merepen vin har me kokres. 5 Me hom, kay dom garda ap t'mare phourende an o moulo tato them, kote kay kek zenlepen hi. 6 Oun har dom len te rhal, oun yon čalo van oun len doha his, phourdan le pen pre, oun bistran man. 7 Yaake vau lenge har i levo, oun har i divyi margodja taprau len tele ap o drom. 8 Me perau pral lende har i baro divyo firho, koleske i čave krik line van. Me dandrau len an kotya oun rhau len pre har i levo, ava, har i divyo firho dandrau len khetne. 9 Israel, mange sikral o doumo, kay me kokres kova hom, kay nay lell tout dran o merepen vin. Yaake aneh bibarht pral toute. 10 Kay hi tiro baro ray, kova kay vell ap tiri rig an tire tsele forya? Kay hi tire čačepangre raya? T'mare phoure penan: Čip i ray oun pralstoune pral mende! 11 Me dom t'men i ray an miri rholi, oun an i rholi lom les t'mendar pale krik. 12 Ko čilačo koova, hoy o Efrayim kras, hi an i liil činlo, hoy hi khetne pandlo oun mishto khatedo. 13 Douka venna pral leste, har i djouvyat douka hi, kay anell i ternepen ap i phoub. O Efrayim hi har i ternepen, kay hayvell gar, te vas o tsiro, kay vell lo boldo, oun yob kamell gar vin te vell. 14 Ginap me len vin dran i zoor, hoy o moulengro themes hi? Lap me len vin dran o merepen? Tou, merepen, kay hi tout ko nasslepen, ap koleste i menshe merenn? Tou, moulengro them, kay hi tout ko pharo nasslepen, hoy anell i menshen pash toute? Kal menshe khaytenn man bouder gar. 15 Ninna te hi o Efrayim mank peskre phralende har i zenelo rouk, hoy hidjrell lače roukengre, bičrell o baro Devel i tato dourho, hoy vell kotar, kay o kham pre djal. Dran o moulo tato them vell lo, oun krell, te venn i tsele panya trouk. Oun yob lell leskro tselo bravlepen lestar krik, – ko tselo kouč koova. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.