Hosea 1 - O Debleskro Lab 2024 (Sinte-Manouche)

¹ Kava hi o lab, hoy penas o baro Devel ap o Hosea, koleskro dad o Beeri his, an ko tsiro, har o Usiya, o Yotam, o Ahas oun o Hiskiya kol bare raya pral o them Youda his, oun o Yerobeam, koleskro dad o Yoash his, ko baro ray pral o them Israel his.

O Hosea hounte romedinerell i loubni

² Har rakras o baro Devel o ersto kopo ap o Hosea, te penell yob leskre laba i menshenge, penas lo ap leste: Rode touke i loubni oun romedine lat! Tout hounte vell čave, kay i loubyatar ap i phoub anlo venn. Yaake sikreh: I menshe an kava them hi har i loubni: Yon moukan man oun nashenn vavar deblenge palla.

³ Oun o Hosea djas koy, oun romedineras i Gomer, kolakro dad o Diblayim his. Oun yoy vas vavarčandes oun anas leske i morsh čaves ap kay phoub.

⁴ Oun o baro Devel penas ap leste: De les ko lab Yesreel! An i tikno tsiro anau ap o rayeskro kheer koy doosh pale, hoy o baro ray, o Yehou, ap peste anas, har maras lo boud mire menshendar an i tala Yesreel. Oun krau, te hi o themes Israel bouder kek ray.

⁵ An ko tsiro krau, te venn kote an i tala Yesreel i Israelengre lourde dino.

⁶ Oun i Gomer vas o douyto kopo vavarčandes, oun anas i čay ap i phoub. Kote penas o Devel ap leste: De lat ko lab Lo-Ruhama! Man hi bouder kek dji i menshenge dran o kheer Israel, oun bistrau lengri doosh bouder gar.

⁷ I menshenge dran o kheer Youda krau miro dji pre. Me, o baro Devel, hom lengro Devel, oun vau lenge ap i rig. Kova krau gar o bogeha, o rhareha, oun o kourepaskro koova, vitar gar i grayentsa oun i kourepangre vourdyentsa.

⁸ Oun har yoy i Lo-Ruhama bouder kek čoučya das, vas li pale vavarčandes, oun anas i morsh čaves ap kay phoub.

⁹ Oun o Devel penas: De les ko lab Lo-Ammi! I menshe an Israel hi gar mire menshe, oun me hom gar lengro Devel.