Hiob 9 - O Debleskro Lab 2024 (Sinte-Manouche)

O Hiobeskro douyto rakepen

¹ O Hiob penas koy pre:

² Čačepah, djinau te hi yaake. Har nay vell i mensho an o čačepen glan o Debleste?

³ Te kamell lo pes leha te čingrell, nay poučals lestar o Devel yek zero koova. Oun o mensho nay penals gar yek pale.

⁴ O Devel hi gosevo an peskro dji oun les hi bari zoor. Kekeske, kay las pes glan te čingrell lo leha, djas kova mishto.

⁵ O Devel čivell i berge yek rigyatar ap i vavar, glan te hayvenn le kova. An peskri rholi vitsrell lo len trouyel.

⁶ Yob taprell ap i phoub oun koya trissell, Ninna i barra, hoy hidjrenn lat, trissenn.

⁷ Rakrell lo zoreles ap o kham, djal o kham gar pre. Oun i bolepangre momelentsa krell lo, te venn le gar diklo.

⁸ Yob kokres kras o bolepen bourhles pral i phoub, oun djal pral o baro pani.

⁹ Yob kras kol bolepangre momlia, hoy kharenna: Baro Vourdin, Orion, Efta Momelengre, ninna kol bolepangre ap koy rig, kay o kham pralstounes tardo hi.

¹⁰ Yob krell savo baro oun zorelo koova, te nay hayvah les gar, savo boud baro koova, hoy kek vavar nay krell, te nay djinah gar, har boud kova hi.

¹¹ Yob djal glan mande doureder, oun me dikom les gar. Yob djal glan mande doureder, oun me hayvom gar, te his lo koy.

¹² Te lell lo yekes zoryah krik, koon kamell les pre te rikrell? Kek nay penell ap leste: Hoy kreh tou?

¹³ O Devel rikrell peskri rholi gar pale, oun vas zorleder har kolla, kay van o baro panyeskro sapeske Rahab ap i rig.

¹⁴ Har nay hatsoms me laba, te nay penap čomone ap leste?

¹⁵ Ninna te vals man čačes, nay rakroms či ap leste, hoy yob mandar poučas. Me nay mangoms kokres lačepen lestar, kay miro čačepaskro ray hi.

¹⁶ Ninna te moukals lo man leha te rakrell, patsau me gar, te shounals lo ap miro rakepen.

¹⁷ Yob bičrell i zorelo phourdepen, te taprell lo pal mande, oun dell man boud doukepen, ninna te krom či.

¹⁸ Yob moukell man gar yek kopo dourho te lell, na-a, yob krell man pherdo ropen oun douk.

¹⁹ Te djoms ap leste zoryah, yob hi o zorleder! Te kamoms les glan i čačepangre te anell, penals lo: Kones kameh te bičrell, te anell lo man koy?

²⁰ Ninna te vaus an o čačepen, miro rakepen anals i phagi pral mande. Ninna te vals kek doosh ap mande, dals lo man i doosh.

^21-22 Kek čilačepen krom me. Miro djipen hi mange bouder či moldo. Kamau bouder gar te djivell. Lauter hi mange yek. Doleske penau me: O Devel dell koles moulo, kay lačo oun čačo hi, oun ninna koles, kay čilačo hi.

²³ Te vell i bari bibarht, oun marell menshen ap yek kopo, palle sal lo pral kova, ninna te hi kek doosh ap lende.

²⁴ Yob das i phoub an o vast i čilačendar. Oun kolla, kay o čačepen vin krenn, kolen kras lo korelo, te dikenn le či. Te his yob kova gar, koon vavar his kova?

²⁵ Miro djipen nashell sikeder krik har i naashepaskro. Hako dives djal trouyel oun anas mange kek barht.

²⁶ Miro djipen nashell yaake sik doureder har i sik bero oun har i baro čirklo, hoy moukell pes tele te perell ap i tikno firho, te taprell lo les.

²⁷ Te penau mange: Kamau te bistrap miri tseli douk, oun kamau te krap i vavar mouy, oun pale te sanap,

²⁸ palle taprau pale daar i tsele doukendar. Oun djinau, glan o Debleskre yaka hi man doosh.

²⁹ Yob kamell i doosh ap mande te dikell. Hoske marap man palle čičeske tele?

³⁰ Ninna te thovoms man gibeha tele, oun mire vasta sapouneha,

³¹ vitsrals lo man an i čikli rheb, te vans mire ripya djoungeles glan mande.

³² O Devel hi kek mensho har me hom, te nay penoms leske i lab pale, te nay djams khetne pash yekeste, koon nay krals o čačepen mashkral mende vin.

³³ Kamoms te dals i čačepaskro morsh mashkral mende, koon o pralstouno pral mende douyende hi,

³⁴ te lell kova o kasht krik, koleha o Devel man dell, oun man bouder gar daar vals!

³⁵ Palle nay rakroms oun man vals kek daar lestar. Yaake har kanna pash mande hi, nay krau kova gar.