Hiob 7 - O Debleskro Lab 2024 (Sinte-Manouche)

¹ I menshe hounte boudrenn phares ap kay phoub. Pengro tselo djipen marenn le pen tele har i boudepangre, kay venn haki rati playsedo.

² Yaake har i boudepaskro, kay kamell, te vell rati, kay vell lo dran o kham, oun kay vell lo playsedo,

³ yaake van mange i tsele čonna, kay djivom čičeske, oun boud ratsya pherdo daar oun douk.

⁴ Te čivom man tele, penau me: Kaana nay stau pale pre? I rat kamell gar pre te herell, oun me rissrau man yek rigyatar ap i vavar, bis te vell o dives.

⁵ Miro mass ap mande hi čakedo kirmentsa oun čik. Miri hauta phagell pre, oun djelto pani nashell vin.

⁶ Mire divessa djan trouyel yaake sik har i soub, hoy pre oun tele djal. Oun kova hoy gomme glan mande hi, nay vell či, hoy shoukar hi.

⁷ Ma biste, miro Devel, te hi miro djipen har i dourho. Mire yaka dikenn bouder kek barht.

⁸ Tou, kay leh man kanna an o yak, nay dikeh man palle bouder gar. Te rodeh pal mande, hom me bouder gar koy.

⁹ Yaake har i folka ap yek kopo bouder gar koy hi, yaake hi o mensho, kay merell. Yob vell bouder gar pale dran o moulengro them.

¹⁰ Pash peskro kheer vell lo gar bouder pale Oun kote, kay djivas lo, vell lo bistedo.

¹¹ Doleske kamau me ninna gar miro mouy te rikrell, kamau te rakrap dran miro djiyeskri daar, oun miri bari douk vin gole te dell.

¹² Hom me o baro pani oder i baro panyeskro firho, te dess tou yaake yak ap mande, te krap či?

¹³ Te penau: Ap miro čiben djal mange feteder, an miro sopen vell miri douk tikneder,

¹⁴ palle bičreh tou mange djoungele sounya, hoy krenn man daar oun traash.

¹⁵ Mange vals feteder, te tassrals man yek. O merepen hi lačeder har sau djipen.

¹⁶ Me kamau gar bouder, kamau gar bouder te djivell. Mouk tele mandar! Miro djipen hi sik trouyel.

¹⁷ Hoy hi o mensho, te dikess tou ap leste, har te vell lo komone baro? Hoske rissreh tou tiro tselo dji pash leste?

¹⁸ Haki tsalla dikeh ap leste, oun moukeh les gar i tikno tsireske dran tiro yak, te dikess palla, har oun hoske yob kova kras, hoy lo kras?

¹⁹ Hoske dikeh gar krik mandar i tikno tsireske, yaake rah har me piyau miri čounger an miro mouy tele?

²⁰ Tou hal kova, kay lell i menshen an o yak. Lom me doosh ap mande? Te vals kova yaake, hoy krom me koleha touke? Hoske hom me kova, ap koleste karye deh? Hom me touke i pharepen, hoy hounte hidjress?

²¹ Hoske leh tou ko čilačepen gar krik mandar, hoy krom, oun bistreh miri doosh? An i tikno tsiro vau tel i phoub. Te rodeh pal mande, hom me gar bouder koy.