Hiob 6 - O Debleskro Lab 2024 (Sinte-Manouche)O Hiobeskro rakepen 1 Oun o Hiob penas koy pre: 2 Kamoms, te nay lals yek miri douk oun miri bibarht, oun čivals len ap i vaga! 3 Kolla hi phareder har i tseli santa glan o baro pani. Doleske rakrau har i dinelo rakrell. 4 Mange djal yaake, har te dals o zorelo Devel karye ap mande, oun leskre fayle vans an mande, hoy anenn mange o merepen. Kova, hoy moukell o Devel ap mande te vell, krell man i bari daar. 5 Kek bourika dell gole, te hi lat zenlepen te rhal. Kek groumni dell gole, te hi lat doha te rhal. 6 Koon kamell i rhapen te rhal, kay kek loon dren hi? Koon kamell o parnepen i yalo yarestar te rhal? 7 Sau rhapen taprau gar an. Kova hi mange yaake djoungeles, te nay lau les gar tele. 8 Ah, te shounell o Devel, hoy lestar mangau, oun krell kova, hoy lestar kamau! 9 Har kamoms, te vals leske shoukar, te dell lo man moulo, te lell lo miro djipen mandar. 10 Kova krals koy douk an miro dji tikneder. An mire tsele bare douka djinau, te krom hako tsiro, hoy o Devel mange penas. 11 Man hi bouder kek zoor, te nay rikrap doureder vin. Hoy ačell miro djipastar, te dikap ap ko tsiro, hoy vella? 12 Miri zoor hi gar dran bar. Oun miro mass hi gar dran saster. 13 Čačepah, djinau bouder gar doureder. Kek hi koy, kay dell man nevi zoor. 14 Kones kek dji hi peskro maleske, koles hi gar o zorelo Devel glan i yaka pash kova, hoy lo krell. 15 Mire mala sikran pen, te hi le rhorhene. Har panya hi le, kay trouk venn. 16 An o vend hi kol panya shila oun tamlo oun gib čakrell len. 17 Te vell o niyal, djal boud oun boudeder pani krik. Te vell tato, hi bouder kek pani koy. 18 I khamele oun lengre klissepangre djan pengro dromestar tele, te rodenn le kote pani. Yon nashenn an o moulo them trouyel oun merenn. 19 Morsha pengre khamelentsa venn dran Tema oun Saba oun rodenn kal panya. 20 Oun har venn le kote, his lauter čičeske: Kek pani hi koy. 21 Yaake har kal panya, hoy bouder gar koy hi, yaake van t'mer kanna mange. T'mer dikenn, har djoungeles mange djal, oun t'men taprell i bari daar. 22 Penom me ap t'mende: Denn man love? Playssrenn t'mer mange yekes t'maro bravlepastar? 23 Lenn t'mer man vin dran i vasta kolestar, kay kamell man te marell? Lenn t'mer man vin dran i vasta kolestar, kay rikrell man tele? Čačepah, savo koova penom gar. 24 Sikrenn mange, kay djom o čačo dromestar tele, oun me rikrau miro mouy. Sikrenn kova mange yaake, te hayvap les! 25 Čače laba rakrenn an o dji. T'mare laba hi či moldo. T'mer penenn mange gar, havo čilačepen me krom. 26 Hi mare laba čilačo an t'mare kanda? Me hom i morsh, kay djinell bouder gar, hoy te krell lo, oun koleskro rakepen hi čičeske. 27 T'mer han save, kay khelans troul i čaveste, koles kek dad bouder hi, oun bikrans t'maro males lovenge. 28 Dikenn mange an i yaka! Rhorhoms me t'menge an o mouy dren? 29 Moukenn tele, čilačepen ap mande pre te anell! Ava, moukenn tele koleha! O čačepen hi ap miri rig! 30 Rakrell miro mouy rhorhene laba? Na-a! Me djinau, hoy lačo oun hoy čilačo hi! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.