Hiob 5 - O Debleskro Lab 2024 (Sinte-Manouche)

¹ De gole oun dik: Hi yek koy, kay shounell ap toute? Havo bolepaskres kameh an te mangell, te vell lo ap tiri rig?

² Koon rhoyrell pes pral halauter, hi dinelo. Leskri rholi tassrell les. Koon peskri rholi gar pale rikrell, hi narvelo. Yob merell ap peskri rholi.

³ Me dikom i dineles, kay har i baro rouk zoreles tardo his. Sik rakrom bibarht vin pral leskro kheer.

⁴ Leskre čaven his kek barht an pengro djipen. Har anas yek čomone ap lende pre, his kek koy, kay vas ap lengri rig, oun las lengro koova an o vast.

⁵ Ko djob, hoy yob činas oun dren anas, kova rhan kolla pre, hoy bokenn. Ninna kova, hoy mank i soubyengre bourra bares vas, lan le penge. Bokle menshe rhan leskro bravlepen.

⁶ Dran i phoub vell kek čilačepen vin, vitar kek bibarht dran o harhetikri phoub.

⁷ Dran o mensheste kokres vell i bibarht, yaake har dran i yag tikne rhačede kotya pre phourdedo venn.

⁸ Te djals mange har touke, rodoms o Debles, oun anoms miro koova glan leste.

⁹ Yob hi kova, kay krell boud baro oun zorelo koova, hoy kek hayvell oun kek vavar nay krell.

¹⁰ Yob dell brishin ap i phoub, oun moukell pani ap o them te perell.

¹¹ Yob krell kolen baro, ap kolende i vavar tele dikan. Oun kolenge ropaske hi, kolen krell lo barhtelo.

¹² Yob dell kova paash hoy penge kolla glan lan, kay kamenn i vavaren pral o kand te dell. Yaake nay krenn le či.

¹³ Yob taprell i goseven an pengro gosvepen. Oun kova, hoy kolla douy čipyentsa mank pende vin kran, kova moukell lo gar te djal.

¹⁴ Pral o dives moukell lo len an o tamlepen te nashell, oun mashkral dives dikenn le pengro drom gar, har te vals rati.

¹⁵ O Devel lell o čorveles dran o čilačo rakepen vin, oun dran o vast o zorleder tserdell lo les vin.

¹⁶ Yaake lell o čorvelo pale nevi zoor an peskro dji, oun o čilačepen hounte rikrell peskro mouy.

¹⁷ Dik, barhtelo hi ko mensho, koleske o Devel leskri doosh sikrell! Doleske ma hade tout khatar leste, te dell tout o zorelo Devel.

¹⁸ Yob doukrell, oun palle čivell lo i pandepen ap ko doukepen. Yob dell khetne, oun leskre vasta krenn pale sasto.

¹⁹ Hako kopo, kay perell i bibarht ap toute, lell lo tout vin. Oun kek čilačepen nay taprell tout an.

²⁰ Te hi bari bok an o them, moukell lo tout gar te merell. Oun an o kourepen moukell lo tout gar i rhareha te marell.

²¹ Yob khatrell tout glan o rakepen, hoy i čilače čipya rakrenn. Te vell i kourepaskro tsiro, hounte vell tout kek daar.

²² Tou nay saneh, te vell kourepen oun bok, oun kol divye firhendar vell tout kek daar.

²³ I barra ap i harhetikri phoub hi tire mala, oun i divye firhe krenn touke či.

²⁴ Oun tou dikeh oun hayveh, te djal lauter mishto an tiro kheer. Ninna kote, kay tire firhe hi, hi kek lendar nashedo.

²⁵ Oun tou dikeh, har tire čave boud venna, ava, kolla, kay pal toute venna, venn yaake boud har o zenlepen ap i phoub.

²⁶ Oun tou mereh an o lačo phourepen, yaake har o djob dren anlo vell, te vas leskro tsiro.

²⁷ Dik, kava lauter hatsam mer vin. Yaake hi kova. Oun tou, shoun koy pre, oun de yak koy pre!