Hiob 42 - O Debleskro Lab 2024 (Sinte-Manouche)

¹ Oun o Hiob penas koy pre ap o baro Debleste:

² Me hayvom kanna, te nay kreh tou halauter. Oun halauter, hoy kameh te krell, kova kreh tou ninna.

³ Tou poučal: “Koon hal tou, kay poučeh dineles: Hi kova gosevo, hoy o Devel krell?” Ava, tout hi čačo: Rakrom, hoy dinelo his, oun hoy gar hayvom oun kolestar či djinom.

⁴ Shoun, penal tou, me poučau toutar. Oun tou peneh mange, hoy kamau te djinell.

⁵ Ap ko tsiro djinom či toutar, har kova hoy mange penlo vas. Kanna dikom tout mire yakentsa.

⁶ Doleske lau pale, hoy rakrom oun hom beshdo an i čik oun an i yagakri čik, te sikrap, kay khaytell man kova, hoy rakrom.

O Devel čivell pes o Hiobeske ap i rig

⁷ Oun har o baro Devel kol laba rakras o Hiobeha, penas yob ap o Elifas dran Teman: “Kova hoy o Hiob, koles miro čačo vast hi, pral mande rakras, hi čačo. Kova, hoy tou oun tire douy mala mandar rakran, hi gar čačo. Doleske hom rhoyedo ap t'mende.

⁸ Kanna lenn efta terne gourma oun efta bakre oun djan pash o Hiob, oun marenn kol firhen kote, oun rhačrenn len mange! Oun o Hiob, koles miro čačo vast hi, hounte mangell man t'menge. Ap koleste shounau oun krau t'mentsa gar, har hounte kroms. T'mer rakran gar o čačepen pral mande har yob kras.”

⁹ Kote djas o Elifas peskre douy malentsa, o Bildad dran Shoua oun o Sofar dran Naama, pash o Hiob, oun yon kran, hoy o baro Devel lenge penas. Oun o baro Devel shounas ap kova, hoy o Hiob lestar mangas.

O baro Devel čivell pale peskri barht ap o Hiob

¹⁰ Oun har o Hiob peskre malenge mangas, las o baro Devel koy bibarht o Hiobestar krik, oun kras les pale bravelo, oun das les douy kope yaake boud, har les his.

¹¹ Oun leskre tsele phrala oun phenya oun kolla, kay les glan ko tsiro prindjran, van pash leste, oun rhan khetne leha, oun rakran lačes leha, oun penan har koy bibarht lenge doukas, hoy moukas o baro Devel pral leste te vell. Oun hakeno das les i sonakaskri bema oun i goustri.

¹² Oun o baro Devel čivas boudeder barht ap o Hiob har glan kova. Oun yob las 14.000 (deesh-te-star-zerya) bakre oun 6.000 (shob-zerya) khamele oun 2.000 (douy zerya) groumya oun 1.000 (yek zero) bourike.

¹³ Oun leske van efta morsh čave boldo oun triin ča.

¹⁴ Oun i phoureder čat das lo o lab Yemima oun i douyti čat o lab Kezia oun i triinti čat o lab Keren-Happouk.

¹⁵ Oun an o tselo them his kek djouvya yaake shoukar har o Hiobeskre ča. Oun lengro dad das len ninna dran leskro bravlepen yaake har lengre phralen, te lenn le kova pal leskro merepen.

¹⁶ Oun o Hiob djivas pal kova gomme 140 (sheel-te-star-deesh) bersha. Oun yob dikas peskre čaven oun čavengre čaven, oun kolengre čaven oun kolengre čaven.

¹⁷ Oun yob meras pal i lengsto djipen.