Hiob 41 - O Debleskro Lab 2024 (Sinte-Manouche)

¹ Hakeno, kay patsell, te nay vell lo zorleder har o Leviatan, hounte dikell dren, te djal kova gar. Hi gar yaake, te perell kova i daryatar ap i phoub, kay dikell les?

² Kek hi yaake dineles, te rhoyrell lo les. Oun koon hi kova, kay nay ačell tardo glan mande?

³ Koon nay djal i rholyah ap mande, oun me anau kova gar ap leskro shero pale? Tel o tselo bolepen hi kek savo!

⁴ Me kamau ninna pral kova te rakrell, have herya o Leviatanes hi, oun har zorelo oun shoukar yob kerdo hi.

⁵ Kek nay rivell leske leskri baya vin, hoy hi kerdo har dran saster! Oun kek nay dell čourye koy dren.

⁶ Nay krell yek leskro baro mouy pre? Na-a! Te dikell lo leskre danda, taprell les i bari daar.

⁷ Leskro doumo čakrenn shouppe, hoy hi zorelo har bar. Yek shouppa pal i vavar hi le pandlo ap leste.

⁸ Oun yek shouppa čivell pes yaake ap i vavar, te nay djal kek dourho mashkral lende dren.

⁹ Yon hi yaake khetne kerdo, te taprell yek an o vavar, oun kek nay tserdell yek dran o vavar vin.

¹⁰ Te phourdell lo dran o nak, vell tikno pani vin, hoy dikell vin har brishin an o kham. Leskre yaka hi lolo har o kham, hoy pre djal.

¹¹ Dran leskro mouy vell yag, ava, yagakre kotya denn vin karye.

¹² Tampa vell dran leskro nak har dran i piri, hoy hi pral i yag tardo, oun an kolate čomone kerell.

¹³ Leskro dourho moukell kasht te rhačell, oun yag djal dran leskro mouy.

¹⁴ Leskri meen hi zorelo. Kay lo ninna djal, taprell i menshen i daar.

¹⁵ Leskro per hi masselo oun zorelo har saster.

¹⁶ Leskro dji hi har bar, ava, yaake zorelo har i baro bar.

¹⁷ Te stell lo pre, taprenn ninna i zorleder bari daar, oun i trashatar tserdenn le pen pale.

¹⁸ Dell yek o rhareha pal leste, krell kova leske či. Kek lengsti čouri, kek vitsepaskro čouri, kek faylo nay doukrell les.

¹⁹ Leske hi saster yaake, har te vals lo phouss, oun lolo saster har phouro sapeno kasht.

²⁰ Kek faylo nay tradell les krik, oun vitsepaskre barra hi leske har phouss.

²¹ Ninna i depaskro kasht hi leske gar boudeder har i phousseskri halma. Oun pral i lengsti čouri, hoy ap leste vitsedo vas, sal lo.

²² Leskro per čakrenn save shouppe, hoy činenn har i paash-dino čaro. Te tserdell lo pes pral koy sapeni phoub, dikell kova vin, har te djals i činepaskro vourdin koy pral.

²³ Te djal lo an o baro pani, krell lo les divyo, har pani, hoy kerell, oun har djet, hoy an i piri pre kerell.

²⁴ Pal leste moukell lo i parno drom. hoy dikell vin, har te vans roupene balla.

²⁵ Ap i phoub hi kek vavar har yob, yaake kerdo, te nay krell leske či daar.

²⁶ Yob dikell halauterenge an i yaka, oun hi o ray pral i tsele divye firhende.