Hiob 40 - O Debleskro Lab 2024 (Sinte-Manouche)1 Oun o baro Devel poučas o Hiobes: 2 Tou kameh tout mantsa te čingrell – mantsa, kay o zorelo Devel hom? Tou, kay doosh ap mande hatsal, oun mange penal, hoy gar mishto krom, pen kanna čomone kay pre! 3 Oun o Hiob penas ap o baro Debleste: 4 Dik, me hom či moldo! Hoy penap me touke? Me čivau miro vast ap miro mouy. 5 Yek kopo rakrom, oun me kamau či bouder te penell. Oun douy kope rakrom, oun me kamau les gar bouder te krell. O Debleskro douyto rakepen 6 Oun o baro Devel rakras pale o Hiobeha dran i baro phourdepen vin, oun penas ap leste: 7 Kanna ste pre har i morsh! Oun me poučau toutar. Oun tou peneh mange, hoy kamau te djinell. 8 Kameh tou čačepah te penell, me djau gar pal o čačepen? Peneh, te anom me doosh ap mande, te nay vess tou koy tardo, har te vals tout čačes? 9 Hi tout savi bari zoor har man? Nay rakreh tou savi zoryah har me? 10 Sike, har baro oun an-diklo hal! Mouk tout an tiro shoukapen oun raylepen te dikell! 11 Čore tiri tseli rholi vin, dik ap lauterende, kay pre-phourdo hi, oun vitse len tele! 12 Ava, dik ap kol pre-phourde, oun kre len tiknes! Oun stake i čilačen ap yek kopo khetne! 13 Paske len halauteren an i phoub, oun pande len dren an o moulengro them! 14 Te kral tou kova lauter, palle sharau ninna me tout, oun penau, te das tiro čačo vast touke i zoor, te hal tou o zorleder. 15 Dik ap ko baro firho, o Behemot, koles me krom, har me tout ninna krom! Yob rhal zenlepen har i groumni. 16 Dik, havi bari zoor les an peskre herya hi, oun havi zoor an leskro per! 17 Leskri pori hi yaake zorelo har i cedertikro rouk. Leskre muskle an leskre herya hi zorelo har pesse shelle. 18 Leskre herya hi har dran saster, leskre kokale har dran lolo saster. 19 Yob his o glanstouno kol firhendar, hoy krom. Me, kova kay les kras, das les ninna leskro rharo. 20 Ap i berge vell o zenlepen baro, hoy leske rhapaske hi, kote, kay i tsele divye firhe penge khelenn. 21 Tel soubyengre bourra čivell lo pes tele, oun khatrell pes mank shilftikro khass an i sapeni čik. 22 Kol pesse soubyengre bourra khatrenn les glan o kham. Oun kol rouka, hoy pash o pani tardo hi, hi troul leste trouyel. 23 Ninna te vell ko lengsto pani zorleder oun divyeder, nashell lo gar darenes krik. Ninna te dell o pani Yordan leske an o mouy, krell leske kova či. 24 Kek nay taprell leske an i yaka, oun tserdell leske i shello an o nak. 25 Tserdeh tou o Leviatanes i ranyah pash toute, oun pandeh i shello troul leskro mouy? 26 Tserdeh tou leske i shello an o nak, oun čiveh leske i goustri an o kokalo tel leskro mouy? 27 Mangell yob toutar, te kress tiro dji leske pre, oun rakrell touha lače labentsa? 28 Krell lo touha vin, te vell lo tiro boudepaskro hako tsireske? 29 Kheleh tou leha, har te vals lo i tikno čirklo, oun pandeh les ap i shello i čenge an tiro kheer? 30 Kamenn les i starepangre te bikrell? Činenn les i parepangre an kotya oun bikrenn leskro mass? 31 Nay deh tou an leskri hauta oun an leskro shero čourye čouryentsa, har te taprals i baro mačo? 32 Čip tiro vast ap leste! Tou kreh kova gar i douyto kopo. Kava kourepen bistreh tou gar. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.