Hiob 4 - O Debleskro Lab 2024 (Sinte-Manouche)

O Elifas: Leskro ersto rakepen

¹ Oun o Elifas dran o foro Teman penas ap leste:

² Te rakrau ap toute, mouk kova touke gar rhoyedo te krell. Me nay rikrau gar mire laba pale.

³ Tou sikral boud menshen o čačo drom, oun kral khine vasta pale zoreles.

⁴ Tire laba hadan koles pale pre, kay peras. Tou kral kol herya pale zoreles, hoy trissan.

⁵ Kanna, kay vas i bibarht pral toute, nashreh tiri zoor. Kanna, kay tout kova tapras, pereh tou khetne i trashatar.

⁶ Tou rikreh touke o Debles glan i yaka pash halauter, hoy kreh, oun djah o čačo drom. Doleske nay leh nevi zoor, oun patseh, te vell lauter pale mishto touke.

⁷ Rake tiro djiyeha, oun pen mange, kay maras o Devel yekes, ap koleste kek doosh his? Kay las lo o djipen yekestar krik, kay his an o čačepen tardo?

⁸ Yaake har me les dikom, vell čilačepen pral kolende, kay čilačepen kran, oun bibarht pral kolende, kay bibarht ap vavarende anan.

⁹ O Devel phourdell ap lende, oun yon merenn. Leskri rholyakro dourho marell len.

¹⁰ Yon nay denn bari gole har i leve, o Devel phagell lenge i danda vin.

¹¹ I leve merenn, te hi len či marepaske oun rhapaske. Oun lengre terne nashrenn pen kate te kote.

¹² Mange van čorrhanes laba penlo. I tikni golyah rakras yek an miro kand.

¹³ Rati, har sovom zoreles dom djoungeles souni.

¹⁴ Traash oun trisslepen vas ap mande. Mire tsele kokale trissan.

¹⁵ I dourho phourdas ap miro mouy, oun mire balla ap mande his pre tardo.

¹⁶ Glan mire yaka dikom yekes tardo, oun djinom gar koon kova his. Shounom či. Palle rakras yek oun penas:

¹⁷ Har nay vell i mensho an o čačepen tardo glan peskro Debleste? Har nay djivell i morsh i djoudjo djipen glan o Debleste, kay kras les?

¹⁸ O Devel nay patsell gar peskre boudepangren an o bolepen. Oun ap leskre bolepangre hatsell lo doosh.

¹⁹ Har boud boudeder hatsell lo doosh ap kolende, kay van dran čik kerdo – ap kolende, kay nay venn khetne stakedo har i kirmo.

²⁰ An i tsalla djal lenge mishto, oun rati merenn le, oun hi bouder gar koy. Oun kek dell yak pre.

²¹ Oun vavar lenn, hoy len his. Yon merenn oun hayvenn gar, hoy lenge djal.