Hiob 39 - O Debleskro Lab 2024 (Sinte-Manouche)1 Prindjreh tou o tsiro, kay i divyi bouzni peskro ternepen lell? Dikal tou, har i vesheskri groumni peskro ternepen las? 2 Nay peneh tou, kitse čonna yon hounte hidjrenn, oun djineh o tsiro, kay le pengro ternepen ap i phoub anenn? 3 Yon beshenn tele, te perell o ternepen gar ap i phoub, te vell lo boldo. 4 Lengre čave venn bares vin ap o them, oun venn zoreles, oun djan penge, oun venn gar bouder pale pash lende. 5 Koon moukas i divyi bourika kote te nashell, kay li kamell, oun pandas lat gar dren? 6 Me dom lat i divyo trouk them, te hi li kote khere, oun ko londo them, te djivell li kote. 7 Koy divyi bourika rikrell pes dour krik koy bari golyatar, hoy krenn le an i forya, oun hounte shounell gar ko morshes, kay dell gole: Sikeder! Sikeder! 8 Koy divyi bourika hatsell peskro rhapen ap i berge, oun rodell pal halauter, hoy zenelo hi. 9 Kamell o divyo gouroum touke te boudrell, kamell lo rati kote te ačell, kay tou tire firhenge rhapen deh? 10 Nay pandeh tou leske i shello trouyel, te boudrell lo touke ap i harhetikri phoub, oun tserdell ko saster, hoy i phoub pre phagell? 11 Fothe zorelo yob hi, nay deh tou leske tiri boudi an o vast, oun nay djineh, te krell lo, hoy tou lestar kameh? 12 Nay patseh leske, te anell lo tiro djob khere ap tiri djobeskri platsa? 13 Barhteles dell koy bari karhni, hoy kharell straussa, peskre moussyentsa. Lakre moussya hi gar har kol moussya oun phora, kolen o storko hi. 14 I straussa moukell peskre yare ap i phoub čiddo, an koy čik moukell li len tates te vell. 15 Oun yoy bistrell, te nay stakrell i heri len khetne, oun te nay stakrenn i divye firhe len paash. 16 Yoy djal pengre čaventsa yaake zoreles trouyel, har te vans yon gar latar. Te merenn le, oun yoy peskre yare čičeske čivas, krell kova lake ninna či vin. 17 O Devel das lat kek gosvepen, oun kras, te hayvell li či. 18 Te hadell li pes oun nashell, hi li sikeder har i gray oun leskro klissepaskro, oun nay sal pral lende. 19 Dal tou o grayes peskri zoor? Čival tou lengste balla pral ap leskri meen? 20 Dal tou leske i zoor, te stell lo har i stepaskro? Te phourdell lo zoreles vin dran peskro nak, darenn i menshe. 21 O gray stakrell peskre heryentsa an i phoub, oun hi barhteles pral peskri zoor, te nashell lo an o kourepen. 22 O gray prindjrell kek daar, oun lell kek traash, oun djal glan o rharo gar pale. 23 Ap leskri rig hi i possita, an kolate stenn i fayle, oun i lengste čourya dikenn vin har yag, te perell o kham pre. 24 Te shounell o gray i phourdepaskri, vitsrell lo pes bari zoryah glan, oun moukell pes gar tele te rikrell. 25 Hako kopo, kay shounell lo i phourdepaskri, dell lo pre gole: Houi! Oun soungell o kourepen foun doural – koy kourepaskri gole i lourdendar oun lengre pralstunendar. 26 Sikral tou o baro čirkles, har djal lo dour pre an o bolepen, oun har te krell lo peskre moussya bourhlo oun djal kote, kay o kham pralstounes tardo hi? 27 Penal tou ap o adlari, te djal lo dour pre ap i berge, te krell lo kote peskro kheer? 28 Ap i bare barra hi lo khere, pral pre ap i berge oun bare barra djivell lo. 29 Foun kotar dikell lo tele, oun rodell peskro rhapen. Foun doural dikenn les peskre yaka. 30 Leskre čave troushenn pal rat, oun kote, kay i moule čiddo hi, kote hi yob ninna. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.