Hiob 38 - O Debleskro Lab 2024 (Sinte-Manouche)

O Debleskro ersto rakepen

¹ Palle rakras o baro Devel o Hiobeha dran i baro phourdepen vin, oun penas ap leste:

² Koon hal tou, te poučeh dineles: Hi kova gosevo, hoy o Devel krell?

³ Kanna ste pre har i morsh! Oun me poučau toutar. Oun tou peneh mange, hoy kamau te djinell.

⁴ Kay hals tou, har me i phoub krom? Pen les mange, te djineh les tou?

⁵ Koon his, kay penas, har bares i phoub vell? Koon his kova, kay čivas i dori pral late, te dikell lo, har bares i phoub vell? Djineh tou kova?

⁶ Ap hoy hi kol hidjepangre tardo, hoy hidjrenn i phoub? Koon čivas ko telstouno bar, hoy rikrell i phoub ap peskri platsa?

⁷ Har lo čiddo vas, givan i tsele bolepangre momlia, hoy tsalla pre djan, oun i bolepangre dan gole i barhtyatar.

⁸ Har o baro pani vin phagas dran i phoub, koon pandas les dren, te djal lo gar pral o tselo them?

⁹ Me homs kova, kay leske i ripen dran volke kras, oun kale volke pral leste čivas.

¹⁰ Oun me sikrom leste, har dour, oun bis kay yob nay djal, oun krom leske voudya oun pandom les dren.

¹¹ Oun me penom: “Bis kate, oun gar doureder vess! Tire zorele panya hounte djan gar pral vergel!”

¹² Penal tou yek kopo an tiro djipen ap i tsalla: “Ab pre!” Oun sikral tou lake lakri platsa?

¹³ Penal lake, te djal li pral i tseli phoub yek rigyatar ap i vavar, yaake te nashenn penge i čilače oun khatrenn pen?

¹⁴ Te djal o kham pre, venn i berge oun tale mishto diklo. Oun i phoub hi tardo shoukar an-rido.

¹⁵ Te vell dives, nay krenn i čilače bouder kek čilačo koova an o tamlepen, oun nay doukrenn bouder gar vavar menshen.

¹⁶ Hals tou an o telstunepen kay i bare panya boldo van? Oun hatsal vin, hoy kote khatedo hi an o telstunepen?

¹⁷ Hals tou tardo pash i voudya an o moulengro them? Oun dikal tou i voudya glan koy platsa, kay hi baro kalepen.

¹⁸ Djineh tou, har dour oun bourhlo i phoub hi? Pen les mange, te djineh kova lauter!

¹⁹ Kay hi ko drom, ap koleste veh pash o kham? Kay hi koy platsa, kay o kalepen hi?

²⁰ Nay aneh tou len ap pengre dromma, oun pale khere ap lengri platsa, kay le vin djan.

²¹ Tou djiness kova lauter, yaake phouro har hal, oun boldo hals, har kova krom!

²² Val tou yaake dour, kay garau o gib pre? Dikal, kay rikrau i brishineskre barra i tsireske hoy vella?

²³ Kolla rikrau pale ko tsireske, kay douka, kourepen oun marepen venna.

²⁴ Kay hi ko drom kote, kay dell i yag karye ap o bolepen? Oun kay phourdell ko dourho vin, hoy vell foun kotar, kay o kham pre djal?

²⁵ Koon kras i drom o brishineske, kay perell lo tele? Koon kras ko drom, kay o bolepaskri yag pre te tele karye dell?

²⁶ Koon dell o brishin ap o moulo tato them, kay kek mensho djivell,

²⁷ te lell o divyo them, kay či bares vas, pani, yaake te vell zenlepen vin.

²⁸ Hi o brishin har i mensho, koles i dad hi? Oun ko pani, hoy haki tsalla ap o zenlepen čiddo hi, hi koles i dad?

²⁹ Dran koneste vin vas o djayedo pani? Koon hi leskri day? Konestar vas o shil boldo, hoy vell tele dran o bolepen,

³⁰ oun krell, te vell o pani har bar, oun o baro pani yaake zoreles, te nay stakrell yek pre?

³¹ Pandal tou nay i bolepangre momlia khetne, kay kharenn efta momelengre? Nay pandeh tou i dorya pre, hoy rikrenn kol momlia khetne, hoy kharenn Orion?

³² Nay moukeh tou i bolepangre momlia vin te vell, te hi lengro tsiro? Nay sikreh tou kolende, hoy kharenn Baro Vourdoun oun Tikno Vourdoun pengro drom, hoy le hounte djan?

³³ Prindjreh tou kol laba, ap kolende o bolepen shounell? Peneh tou leske, har te vell lo ray pral i phoub?

³⁴ Deh tou ap i volke gole, te čorenn le brishin ap toute tele?

³⁵ Bičreh tou o bolepaskri yag tele ap i phoub, oun poučell koya toutar: Kay kameh, te dap pre te tele karye?

³⁶ Koon čivas o gosvepen kote, kay lo khatedo hi? Oun koon krell, te nay hayvell i mensho čomone?

³⁷ Koon hi yaake gosevo, te djinell lo, har boud volke koy hi? Koon čorell lengro pani ap i phoub tele?

³⁸ Palle vell dran i stauba zoreli čik, oun i pre-phagedi phoub vell pale yek tselo kotar phoub.

^39-40 Te hi i levetsa oun lakre čave an o khatepen čiddo oun lourenn ap i firho, nay hatseh tou lake yekes marepaske, te venn lakre čave čalo?

⁴¹ Koon hi kova, kay dell o korakeske leskro rhapen, te denn leskre čave pash o Debleste gole, oun i bokatar kate te kote nashenna?