Hiob 37 - O Debleskro Lab 2024 (Sinte-Manouche)1 Koy pral trissell miro dji, oun dell sik oun divyo. 2 Shounenn, har bares yob gole dell, har rhoyedo koya gole dran leskro mouy vell! 3 Tel o tselo bolepen moukell lo koy yag karye te dell, oun koya djal pral i tseli phoub yek rigyatar ap i vavar. 4 Pal kova vell koy bari zoreli gole shounlo, hoy hi har o baro Debleskro rakepen. Oun yob rikrell peskri yag gar pale, te moukell lo peskro rakepen te shounell. 5 Te moukell o Devel peskro rakepen te shounell, krell lo kova savi bari golyah, te ačell menge o rakepen krik. Yob krell baro koova, hoy nay hayvah mer gar. 6 Ap o gib penell lo: Pere ap i phoub! Ap i volke: De zorelo brishin! 7 Yaake krell lo, te moukenn i menshe pengri boudi čiddo, te dikell hakeno, hoy yob nay krell. 8 I divye firhe djan an pengro khatepen, oun čivenn pen kote tele. 9 O zorelo phourdepen vell foun čačes dran peskro kheer, oun o shil vell foun serves. 10 Dran o dourho, hoy dran o Debleskro mouy vin djal, djayell o pani. Oun kol bourhle bare panya venn zorelo har bar. 11 Yob krell i volke pharo oun pherdo pani, oun dran lende dell i yag karye. 12 Kol volke djan kate te kote, yaake har yob len bičrell, te krenn le halauter yaake, har yob les kamell ap i tseli phoub. 13 Nay vell, te bičrell lo o brishin, te dell lo o themes i phagi, ninna nay vell, te bičrell lo les, te sikrell lo peskro lačepen. 14 Hiob, shoun kava mishto! Ač, oun de yak ap kova, hoy o Devel an peskri zoor krell! 15 Djineh tou, har o Devel i volkenge penell, kay te djan le? Oun har lo i yag dran lende karye vin dell? 16 Hayveh tou, har i volke tel o bolepen djan, oun gar tele perenn? Savo koova nay krell kokres kova, kay halauter djinell. 17 Tou, koleske tel i koola tato vell, te phourdell i tato dourho pral o them, 18 nay kreh tou o bolepen bourhles pral i phoub, har yob kova kras, te vell o bolepen zoreles har i dikepaskri? 19 Pen tou menge, hoy penas mer leske? Mer djinah či. Oun men hi či, te anas glan leste! 20 Penell yek leske: Dik, kate hi yek, kay kamell touha te rakrell? Na-a! Kova vals yaake, har te kamals lo maredo te vell. 21 Kanna nay dikell kek an o kham, yaake zorelo hi o kham, te phourdas o dourho i volke krik. 22 Foun kotar, kay norden hi, vell čomone har sonakay. O Devel vell an peskro raylepen. Ko raylepen troul leste krell men daar. 23 Pash leste, ko zoreleste, nay vah mer gar. Leskri zoor hi baro. Hako tsiro krell lo, hoy mishto hi, oun dell hakeneske peskro čačepen. 24 Doleske dikenn i menshe pre ap leste. Yob dikell kekes an, kay rikrell pes yekeske, kay hi gosevo. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.