Hiob 36 - O Debleskro Lab 2024 (Sinte-Manouche)

¹ Oun o Elihou rakras doureder oun penas:

² Rike gomme i tikno tsiro mantsa vin, oun me kamau touke boudeder te sikrell! Man hi čomone boudeder te penell o Deblestar.

³ Me sikrau touke ko boud koova, hoy me djinau, te sikrap, te hi kova čačo oun mishto, hoy kras o Devel, kova, kay man kras.

⁴ Čačepah miro rakepen hi kek rhorhepen. I morsh, kay djinell, kolestar yob rakrell, hi glan toute tardo.

⁵ O Devel hi baro oun zorelo, oun dikell ap kekeste tele. Koy hi či, hoy hayvell oun djinell yob gar.

⁶ Yob moukell o čilačes gar djides, oun vell koleske ap i rig, kay tele rikedo vell, te lell yob peskro čačepen.

⁷ Yob dell yak ap kolende, kay hi an o čačepen tardo, oun moukell len khetne i rayentsa ap rayengre beshepangre te beshell. Hako tsiro hi le baro.

⁸ Te hi le pandles čiddo an shelle, oun lenge djal djoungeles an o stilepen,

⁹ palle sikrell yob len, hoy le kran, oun havi doosh yon ap pende anan, har phourdan le pen pre.

¹⁰ Oun yob krell lenge i kanda pre, te shounenn le, har yob len trad dell. oun penell lenge, te moukenn le pengre čilače dromma.

¹¹ Te shounenn le ap leste, oun krenn, hoy yob lendar kamell, palle djal lenge mishto, oun yon hi barhtelo an kol tsele bersha, hoy glan lende hi.

¹² Te shounenn le gar ap leste, nashrenn le pengro djipen, oun hayvenn gar, hoske kova lenge yaake djal.

¹³ Kolla, kay kamenn či o Deblestar te djinell, rikrenn pengri rholi an lengre djia. Ninna te dell o Devel len i phagi, denn le gar gole, te vell lo lenge ap i rig.

¹⁴ Doleske merenn le an ladj, an i tsiro, kay hi le gomme terno.

¹⁵ Phare tsirya oun douka hi ko Debleskro drom, har rakrell o Devel i mensheha. Koy krell lo leske i kanda pre, te shounell lo ap leste.

¹⁶ Ninna tout anals o Devel vin dran i bibarht, oun anals tout kote kay bouder kek daar hi, oun dals tout lauter, hoy tout hounte vell djipaske. Oun t'mari rhapaskri vals pherdo lačo koova.

¹⁷ Kanna lal tou i phagi har i čilače lenna. I čačepaskre laba hi vin rakedo pral toute, oun tiri phagi vas.

¹⁸ De yak, te anell tout tiri rholi gar ap i djoungelo drom! O Debles nay gineh tou gar, kitse love tou ninna deh!

¹⁹ Tiro bravlepen oun tiro sonakay hi gar doha. Vitar gar kova, hoy tou tiri zoryah nay kreh.

²⁰ Ma pen: Mou vell sik rati! Kova hi o tsiro, kay i natsyone ap yek kopo bouder gar koy hi.

²¹ De tou yak, te vess gar ap i čilačo drom! Tire douka van ap toute, te rikress tou tout pale o čilačepastar.

²² Dik, har baro o Devel hi! Leskri zoor hi bareder har halauter! Koon hi i sikepaskro har yob?

²³ Kek nay penell leske, hoy te krell lo! Kek nay penell leske: Hoy kral, hi gar mishto.

²⁴ Ma biste, te sharess o Debles koleske, hoy yob kras, har ninna vavar menshe sharenn les pengre gilyentsa!

²⁵ I tsele menshe dikenn ap kova, hoy lo kras, ninna te nay dikenn le les kokres foun doural.

²⁶ Dik, o Devel hi yaake baro, te nay hayvah gar, har baro yob hi. Oun kek nay hatsell vin, har phouro yob hi.

²⁷ Yob tserdell o pani pre pash o bolepen, oun lell les khetne, te vell brishin,

²⁸ hoy tele perell dran o bolepen ap kol boud menshende.

^29-31 Yaake dell lo lenge boudeder har doha te rhal. Kek nay hayvell, har o Devel i volken ap o bolepen čivas, oun har vell koy bari gole dran leskro bolepaskro kheer, te dell i yag ap o bolepen karye troul leste trouyel. O telstunepen o baro panyestar ačell an o tamlepen.

³² An leskro vast rikrell lo koy yag, oun moukell lat kote karye te dell, kay yob kamell.

³³ Koy bari gole, hoy vell koy pashel, sikrell, te vell i zorelo phourdepen. Oun ninna i firhe hayvenn kova.