Hiob 35 - O Debleskro Lab 2024 (Sinte-Manouche)1 Oun o Elihou penas palle: 2 Patseh, te hi kova čačo, hoy penal? Tou penal: “Me hom an o čačepen glan o Debleste.” 3 Oun tou poučeh: “Hoy hi man kolestar, te lau kek doosh ap mande? Havo lačepen lom koleske?” 4 Kova kamau touke te penell, touke oun tire malenge pash toute: 5 Dik pre, dik an o bolepen pre! Dik ap i volke dour pral toute! 6 Koy doosh, hoy tou ap toute leh, kolah nay kreh tou či ap o Debleste. Te kral boud čilačo koova, nay kreh tou leske či koleha. 7 Te hal tou an o čačepen tardo, hoy hi les kolestar? Na-a, tou nay deh leske či dran tiro vast, hoy leske čomone moldo hi. 8 Kolla hi i vavar menshe, kolenge kova djoungeles hi, te kreh čilačo koova, oun kolenge kova lačo hi, te kreh lačo koova. 9 Te krenn i zorele i vavarenge boud čilačo koova, rovenn kolla, oun denn gole pal yekeste, kay lell len vin dran i vasta kol zorelendar. 10 Oun kek lendar poučell pal o Debleste, kay les kras. Oun yob hi kova, kay krell, te nay givell i mensho gilya an i kali rat. 11 Yob kras, te djinas mer boudeder har i firhe ap i phoub, oun kras men gosveder har i čirklen tel o bolepen. 12 Te denn i čilače palle gole, kolla, kay pen yaake bares kran, penell o Devel lenge či pale. 13 Lengri gole hi čičeske! O zorelo Devel shounell lat gar, oun dell kek yak koy pre. 14 Tou Hiob peneh, tou nay dikeh les gar! Tiro koova hi glan leste čiddo. Mouk gar tele, te dikess ap leste! 15 Tou peneh, o Devel moukell peskri rholi gar te vell. Dell lo vitar gar yak ap o narvelo rakepen? 16 O Hiob hi i baro mouyeskro, yob rakrell, hoy či-moldo hi, krell bare laba, oun djinell gar, hoy lo rakrell. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.