Hiob 34 - O Debleskro Lab 2024 (Sinte-Manouche)

O Elihou: Leskro douyto rakepen

¹ Oun o Elihou rakras pale oun penas:

² T'mer goseve morsha, shounenn miro rakepen! T'mer, kay sikle han, shounenn, hoy kamau t'menge te penell.

³ Yaake har o mouy hayvell, hi o rhapen lačo oder gar, yaake hounte hatsell o kand vin, hi ko rakepen mishto oder gar.

⁴ Mer te hatsas kanna khetne vin, hoy an kava koova čačo oun mishto hi.

⁵ O Hiob penas: “Me hom an o čačepen tardo. Oun miro čačepen las o Devel mandar krik.

⁶ Hounte rakrap rhorhepen oun penap: Me lom doosh ap mande? Mange vas i baro doukepen dino, ninna te hi kek doosh ap mande.”

⁷ Koon hi savo morsh har o Hiob, kay rikrell pes gar pale te praasell lo i vavaren? Kova hi leske har te piyals lo pani.

⁸ Oun yaake hi lo har yek kolendar, kay djoungelo koova krenn, oun djal ap o drom, kay i čilače djan.

⁹ Yob penas kokres: Či hi yekes kolestar, te kamell lo o Debleskro maal te vell!

¹⁰ Doleske, t'mer morsha, kay yaake boud hayvenn, shounenn ap mande! An kek tsiro krell o zorelo Devel i čilačo koova. Hako tsiro hi lo an o čačepen tardo!

¹¹ Yob dell o menshes ap o shero pale, hoy yob kras, oun yaake, har djivas lo, vell kova ap leste.

¹² Čačepah, o zorelo Devel krell kek čilačo koova, oun o čačepen rissrell lo gar trouyel.

¹³ Koon his, koon les i phoub an leskre vasta das? Kek! Yob kras i phoub. Kek hi pral leste tardo.

¹⁴ Te lals yob peske glan, te lell lo peskro djipaskro dourho palpale o menshestar,

¹⁵ palle merans halauter, hoy djivenn, ap yek kopo, oun o mensho vals pale čik.

¹⁶ Hiob, te hayveh, hoy penau, palle shoun kava! De mishto yak ap miro rakepen!

¹⁷ Nay vals o Devel o ray pral i phoub, te stakrals lo peskre pirentsa ap o čačepen? Kameh doosh ap o zorelo Debleste te anell, kay hako tsiro an o čačepen tardo hi?

¹⁸ Yob nay penell ap i baro rayeste tou či-moldo oun ap i pralstuneste tou čilačo!

¹⁹ Yob dikell gar i pralstounes feteder an har i vavares, oun tserdell o braveles gar o čorveleske glan. Leskro vast kras len halauter.

²⁰ Ap yek kopo merenn le. Mashkral an i rat trissenn le oun hi gar bouder. Kol zorele venn krik lino kek mensheskro vasteha.

²¹ O Devel lell hako koova an o yak, hoy i mensho krell, oun dikell les, kay lo ninna djal.

²² Kek rat oun kek kalepen hi yaake tamlo, te nay khatrans pen i čilače kote dren.

²³ O Devel hounte čivell kek tsiro dren, te anell lo i menshes glan peste, te rakrell lo o čačepen pral leste vin.

²⁴ Yob dell i zorele rayen khetne, oun hounte hatsell gar vin, hoy yon kran. Ap lengri platsa čivell lo vavaren.

²⁵ Čačepah, yob djinell ko koova, hoy le kran. Rati moukell lo len te perell, te venn le khetne stakedo.

²⁶ Ap i platsa, kay i čilače pengri phagi lenna, oun hakeno nay dikell len, dell lo len lengri phagi.

²⁷ Kova krell lo doleske, kay djan yon leskro dromestar tele, oun dan gar yak ap kova, hoy yob lendar kamas.

²⁸ Yon djan yaake čilačes i čorvelentsa trouyel, te dan yon gole ap o Debleste. Oun yob shounas koy gole kolendar, kay tele rikedo van.

²⁹ Te rikrell pes o Devel pale, nay penell kek leske: Tou anal doosh ap toute! Te khatrell lo pes, nay dikell les kek. Hoy nay krenn i menshe, hoy nay krell i natsyona,

³⁰ te čivals o Devel i čilačes pral lende, te vell lo lengro ray, oun kova anell len o čačo dromestar tele?

³¹ I mensho hounte penals ap o Debleste: “Me hidjrau miri doosh, oun kamau bouder gar čilačo koova te krell.

³² Sike tou man, hoy me gar dikau! Te his kova čilačes, hoy me krom, krau me les palle bouder gar.”

³³ Kameh, te anell o Devel ap saveste i phagi? Kameh tou kova gar? Tou hounte peness, hoy kameh, oun gar me. Pen menge kanna, har kava koova dikeh!

³⁴ Goseve morsha oun save, kay hayvenn boud, oun shounan, hoy penom, kolla penenn ap mande:

³⁵ O Hiob djinell gar, hoy lo rakrell. Oun leskre laba sikrenn, te hayvas lo gar boud.

³⁶ Kamoms, te vals o Hiob glan i čačepangre morshende anlo, te lenn yon hakenes leskre labendar an o yak, hoy yob rakras, Yob rakrell har i čilače rakrenna.

³⁷ Gar kokres doosh anas lo ap peste, na-a, yob hadas pes ninna pral o Debleste. Glan mare kanda krell bare laba oun rikrell o Debles dineleske.