Hiob 32 - O Debleskro Lab 2024 (Sinte-Manouche)

O Elihou: Leskro ersto rakepen

¹ Oun kol triin morsha penan bouder či pale ap o Hiob doleske, kay his yob an peskre yaka an o čačepen tardo.

² Kote vas i rholi an o Elihou, koleskro dad o Barakel his i menshendar, kay kharenn Bouzarya, dran i familya Ram. O Elihou vas rhoyedo doleske, te patsas o Hiob, te vals yob boudeder an o čačepen har o Devel.

³ Ninna vas lo rhoyedo pral o Hiobeskre triin mala: Ninna te hatsan yon či, hoy nay penenn le o Hiobeske pale, patsan le, te his doosh ap leste.

⁴ O Elihou rikras pes o tselo tsiro pale peskro rakepah, bis te rakran kol vavar o Hiobeha. Yon his phoureder har yob.

⁵ Har yob kanna dikas, te his len či bouder te penell, moukas lo peskri rholi vin.

⁶ Oun o Elihou, koleskro dad o Barakel his, ko Bouzari, penas: Me hom terno. T'mer han phoure morsha. Doleske darom t'menge te penell, hoy djinau.

⁷ Me penom mange: Mouk i phouren te rakrell. Yon hi kolla, kay nay sikrenn, hoy gosvepen hi.

⁸ Hi čačo, kova, hoy krell i menshes gosevo, hi o dourho o zorelo Deblestar, koles yob an i mensheste dren čivas.

⁹ I phoure hi gar hako tsiro i gosveder. Lengro phourepen krell gar, te djinenn le, hoy čačo hi.

¹⁰ Doleske penau me: Shounenn kanna, hoy man penepaske hi! Me kamau ninna te sikrap, hoy djinau.

¹¹ Me moukom t'men vin te rakrell, oun dom yak have laba t'mer hatsans, oun har t'mer kava koova dikenn.

¹² Oun me shounom mishto, hoy penan. Oun kek his mank t'mende, kay nay sikrals o Hiobeste, te his les gar čačo. Kek penals leske ap leskro rakepen čomone pale.

¹³ Ma penenn: “Mer hatsam vin, hoy gosvepen hi. Kova hi o Devel, kay hounte sikrell leste leskri doosh, oun kek mensho!”

¹⁴ Ap mande rakras o Hiob gar. Oun me rakrau vitar gar kol labentsa, hoy t'mer rakran ap leste pale.

¹⁵ Hiob, tire triin malenge ačas o rakepen krik. Yon djinenn bouder gar, hoy te penell touke.

¹⁶ Har nay rikrap man kanna pale, kay yon gar bouder doureder rakrenn? Kote hi le tardo oun nay penenn či pale.

¹⁷ Me kamau ninna te penell, hoy me djinau, oun kova, hoy me hayvom, t'menge doureder te dell.

¹⁸ Man hi boud laba te penell. Me nay rikrau gar mire laba pale, hoy an mande hi oun vin kamenn.

¹⁹ Te nay rakrau gar, djal mange har i molyakro gono, kay nevi mool dren hi, hoy nay vell gar vin, oun o gono pre phagell.

²⁰ Me hounte rakrap, te nay lap pale dourho. Ava, kamau vin te rakrell, hoy kamau t'menge te penell.

²¹ Me vau ap kekeskri rig tardo, oun kek mensheske rakrau pal o mouy.

²² Me hayvau man gar koy pre, te rakrap yekeske pal o mouy. Te kroms kova, lals kova, kay mange miro djipen das, sik miro djipen pale mandar krik.