Hiob 31 - O Debleskro Lab 2024 (Sinte-Manouche)

¹ Me djom i sovel mire yakentsa dren, te dikap gar loubekanes i terni čake palla.

² Te rikroms me gar ap kova, hoy krals palle mantsa o Devel an o pralstunepen? Čačepah o zorelo Devel, kay hi an o pralstouno bolepen, dals man kek lačo koova koleske!

³ Pral i čilačo vell bibarht, oun koleske, kay krell djoungelo koova, djal či mishto.

⁴ O Devel dikell halauter, hoy krau, oun djinell, havo drom mire pire djan.

⁵ Djom me i rhorheno drom? Rakrom douy čipyentsa?

⁶ Me mangau o Debles, te dikell lo palla an o čačepen: Lom me doosh ap mande oder gar? Palle dikell lo, te hom an o čačepen tardo.

⁷ Te djan mire herya tele leskro dromestar, oun te nashas miro dji mire yakenge palla, oun te kran mire vasta čomone, hoy gar mishto hi,

⁸ palle kamau djob an i phoub te vitsrell, oun i vavar nay rhal kova, hoy kolestar bares vas. Oun kova, hoy mange dran i phoub vin vas, tserdenn palle i vavar dran i phoub vin.

⁹ Te moukas pes miro dji i vavareskri djouvyake dren, oun te louroms me ap late pash koleskro voudar,

¹⁰ palle te kerell miri romni i vavareske, oun vavar morsha te sovenn lah!

¹¹ Kova vals i vi-ladjedo koova, oun i doosh, hoy hounte vell glan i čačepaskre morshende anlo.

¹² Savi doosh vals har i yag, hoy man tseles rhačrell, oun ninna halauter, hoy man hi, pre rhals.

¹³ Te doms miro boudepaskres – nay vell i morsh, nay vell i djouvel – gar čačes an i čingepen, kay les čačes his,

¹⁴ hoy kroms me nay palle, te hadals pes miro Devel pre, oun dikals ko koova palla? Hoy nay penoms me leske?

¹⁵ Yob, kay kras man an miri dakro per, hi kova, kay kras ninna kolen, kay mange boudrenn.

¹⁶ Dom me gar o čorveles kova, hoy lo mandar mangas? Vom me gar koy djouvyake ap i rig, kolakro rom meras, oun kay gar doha djipaske his?

¹⁷ Rhom me miro rhapen kokres, oun dom kolen či, kolen bouder kek dad his?

¹⁸ Foun tiknes pre dom me ap lende yak, har te voms me lengro dad. Oun miro tselo djipen vom kol djouvyenge ap i rig, kolengro rom meras.

¹⁹ Te dikom yekes, kay yaake čorvelo his, te his les kek ripen, te tatsrell lo pes,

²⁰ dom me leste koola kerdo dran i balla mire bakrendar, te vas leske tato. Oun yob parkras pes pash mande o tselo djiyestar.

²¹ An kek tsiro hadom me miro vast pre ap i čaveste, koles kek dad bouder hi, ninna te djinom, te hi halauter ap miri rig, kay his an o foreskro voudar beshdo.

²² Te kroms me sau koova, palle mou phagell miri moussi, oun vin tserdedo vell dran miri phik!

²³ Sau koova nay kroms me gar, me trashau o Deblestar, oun hounte daroms, te vell leskri rholi pral mande!

²⁴ Miro sonakay vas gar miro devel. Ap leste penom me gar: Tou hal kova, hoy man hounte vell!

²⁵ Me stom gar i barhtyatar, te vas miro bravlepen baro, oun mange yaake boud khetne lom.

²⁶ Me mangom gar o kham an peskro raylepen an, vitar gar o čon an peskro shoukapen.

²⁷ Miro dji rissras pes gar čorrhanes pash lende, te vitsroms me lenge i vasteskri čoum koy!

²⁸ Kova vals i doosh, hoy hounte vals glan o čačepangre morshende anlo. Koleha phoukroms ap o Debleste an o pralstunepen.

²⁹ Me vom gar barhtelo koy pral, har djas koleske djoungeles, kay mange čilačepen kamas. Vitar gar dom gole i barhtyatar, har vas i bibarht pral leste.

³⁰ Me anom kek doosh ap mande, te rakroms i bibarht pral leste vin, te merell lo.

³¹ Na-a, lauter kay pash mande djivenn, djinenn, hakeno, kay pash mande vas, las lačes oun doha te rhal.

³² Kolla, kay ap pengro drom pash miro voudar van, kolenge krom me pre. Kek vi-themari hounte sovas vin ap o drom.

³³ An kek tsiro kamom miri doosh te khatrell, har vavar menshe krenn.

³⁴ Man his kek daar kolestar, hoy nay rakrens i menshe pral mande, vitar kek traash i ladjatar, hoy nay anens mire menshe ap mande, te penoms doleske či, oun djoms gar glan miro voudar.

³⁵ Ah, te vals yek koy, kay ap mande shounell! Hoy penom, tel kova nay činau miro lab. O zorelo Devel te rakrell pale! Kay hi ko liil, an koleste kova miri doosh pre-činas, kay penell, te lom doosh ap mande?

³⁶ Čačepah me hadaus kava liil ap miri phik pre, oun hidjraus les har i rayeskri stadi ap miro shero.

³⁷ Me penaus leske hako koova, hoy krom an miro djipen, oun har i ray vaus me glan leste.

³⁸ Te das miri harhetikri phoub gole pral mande, oun leskri čik hounte rovas,

³⁹ te rhom ko djob, oun playsrom koleske či, oun moukom i harhen i bokatar te merell,

⁴⁰ palle te vell bouder kek gib oun djob vin dran miri phoub! Na-a, palle te anell i phoub soubyengre bourra oun djoungelo zenlepen vin! Kate herell o Hiobeskro rakepen pre.