Hiob 30 - O Debleskro Lab 2024 (Sinte-Manouche)

¹ Kanna sanenn le pral mande, kolla, kay terneder hi har me, kolengre dada an mire yaka gar doha moldo his, te denn le yak ap mire bakre khetne mire djouklentsa.

² Len his bouder kek zoor an pengre moussya. Hoy vals man kolestar, te boudrans le mange?

³ Čorvele his le, oun i bokatar dandran le ap kova trouyel, hoy le an o moulo divyo them hatsan, kay kek djivell.

⁴ Kote rodan le pen o londo zenlepen khetne mashkral i bourra, oun rhan ninna i draba kol bourrendar, hoy kharenn Ginster.

⁵ Foun kotar, kay i menshe khetne djivenn, van yon vin tradedo. Yon dan pal lende gole, har pal i čorepaskro.

⁶ An i barrengre berge, hoy djan ap i rigya i lengsto panyestar dour pre, hi le khere, ninna tel i phoub, oun mank i bare barra.

⁷ Mashkral i bourra denn le gole, oun tel i soubyengre bourra venn le khetne.

⁸ Či-molde hi le, kolengre laba kek prindjrell, oun kay van vin tradedo dran o them.

⁹ Oun kanna givenn lengre čave sapaskre gilya pral mande. Me vom lenge rakepaske.

¹⁰ Lenge vell djoungeles glan mande, oun rikrenn pen dour krik mandar, oun čoungrenn mange an o mouy.

¹¹ O Devel phagas miri zoor, oun kras man tiknes. Doleske krenn le mantsa, hoy le kamenn.

¹² Ap miri čači rig hadenn pen čilače terne morsha, oun stakrenn mange mire herya krik. Oun kran mange save dromma, te hounte perap ap lende.

¹³ Yon kran bare rhebya an miro drom, te nashap mange gar. Oun kek hi koy, kay len pale rikrell.

¹⁴ Har lourde i foreskri massouri paash krenna, oun tel i barra, hoy tele peran, dren venna, venn yon pash mande.

¹⁵ Bari daar tapras man. Miro an-dikepen djas peske, har te phourdals les i dourho krik. Oun miri barht djas krik har i folka.

¹⁶ O djipen an mande nashell krik har pani. Čilače divessa van pral mande.

¹⁷ Rati dell i douk čourye an mire kokale. oun koy douk, hoy man rhal, sovell gar.

¹⁸ Peskri zoryah krell li miri hauta phouro. Koya hi mange har miro gad, hoy mange bourhlo troul i meen hi.

¹⁹ Yob vitsras man an i čik. Kanna hom me ninna bouder či har čik.

²⁰ Me dau ap toute gole oun tou rakreh ap mande gar pale. Me hom kay tardo, oun tou deh gar yak ap mande.

²¹ Tou val mange har i čilačo, oun tiri tseli zoryah leh man palla.

²² Tou moukeh i dourho te vell, hoy hadell man pre oun phourdell man krik, oun vitsrell man pre oun tele an i baro phourdepen.

²³ Me djinau kanna, tou kameh man an o moulengro them te anell, kay i tsele djide khetne venn pal lengro merepen.

²⁴ Te peras yekeskro kheer khetne, oun yob hi čiddo tel i barra, rikrell lo gar peskro vast vin? Te vell i bibarht pral yekeste, dell lo gar gole?

²⁵ Me rovom kolenge, kay len save phare divessa his. Oun miro dji doukas, har dikom ko čorveles.

²⁶ Me patsom, te vell lačepen ap mande, oun čilačepen vas. Mire yaka rodan pal i momeli, oun kalepen vas.

²⁷ Lauter an mande rhačella, oun i douk moukell gar pale. Phare djoungele divessa peran pral mande dren.

²⁸ Ropah djau me trouyel, oun kek kham dikau me bouder. Kote kay i menshe khetne venn, stau me pre oun dau gole.

²⁹ Miri gole hi har i gole i divye djouklendar oun kol bare čirklendar, kay kharenn autruches.

³⁰ Miri hauta vas kalo ap mande, oun perell mandar tele. Oun o fibro rhačell an mire kokale.

³¹ Miri doryengri bashepaskri bashrell kokres ropaskre gilya. Oun o bashepen ap miri tikni phourdepaskri hi har o ropen pral yekeste, kay meras.