Hiob 3 - O Debleskro Lab 2024 (Sinte-Manouche)O Hiobeskro rakepen 1 Pal kova kras o Hiob peskro mouy pre, oun praasas ko dives, kay lo boldo vas. 2 Oun o Hiob penas: 3 Nashedo hounte djal ko dives, kay me boldo vom, oun koy rat, kay miri day mantsa vavarčandes vas! 4 Mou vell ko dives kali rat, – kay kek bolepaskri momeli pre djal, – kay ninna o Devel an o pralstunepen ko dives bistrell! 5 Mou vell ko dives pherdo kalepen oun tamlepen! Kale volke mou ačenn pral leste! Oun o kham mou vell kalo ap ko dives, te vell i menshenge bari daar! 6 Koy rat, kay miri day mantsa vavarčandes vas, mou lell o tamlepen koy rat peske, te vell li gar kharedo mank i tsele divessa an o bersh, vitar gar mank i divessa an o čon! 7 Kek djouvel te vell vavarčandes an koy rat, Kek te dell gole i barhtyatar an koy rat! 8 I dourkepangre mou praasenn ko dives – kolla, kay hayvenn i bibarht pral i dives vin te rakrell, oun kay nay djangrell o Leviatan pre. 9 Koy rati te ačell kalo, kek bolepaskri momeli djal pre taysarlakro. Koy rati mou dikell pal o dives – oun kova vell gar. O kham djal gar pre. 10 Koy rati moukas miri day vavarčandes te vell, oun moukas man bari bibarht te dikell. 11 Hoske merom me gar, har boldo vom, har me dran late vin vom? 12 Hoske las li man an i gali? Hoske das li man i čouči te piyap? 13 Te voms moulo, voms koy čiddo, oun sovoms, oun voms pokones. 14 Palle voms čiddo mank i bare rayende oun pralstunende ap kay phoub, kay kran pen shoukar moulengre khera. 15 Voms čiddo mank i pralstunende, kolen sonakay his, oun kolengre khera pherdo roup his. 16 Palle čivans le man tel i phoub har sau ternepen, hoy glan o tsiro moules boldo vas. Palle voms paskedo har savo čavo, hoy o kham kek tsireske dikas. 17 Kote moukenn i čilače tele pengri divyi golyatar. Kote nay sovenn kolla, kay hounte maran pen tele. 18 Ninna i pandle venn bouder gar tradedo, oun shounenn kekes bouder, kay dell len an-gole čilače labentsa. 19 Kote hi o baro oun o tikno, lauter yek har o vavar. Oun o pandlo boudepaskres hi bouder kek ray pral peste. 20 Hoske moukell o Devel kolen djido, kay len yaake phares hi? Hoske dell lo kolen o djipen, kolengro dji pherdo ropen hi? 21 Yon kamenn te merenn, oun o merepen vell gar. Yon rodenn les boudeder har bravlepen, 22 oun givans oun sans i barhtyatar, te nay merans le. 23 Hoske hounte djivell kova, koleskro drom khatedo hi, oun koles o Devel haki rigyatar dren pandas? 24 Mire sva hi miro rhapen. oun koy gole, hoy dau, vell dran mande vin har pani. 25 Kova, hoy me darom, vas pral mande. Kolestar trashom, kova tapras man. 26 Me hatsom kek rouha, oun nay lom kek nevi zoor. Dap ap dap vas ap mande. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.