Hiob 29 - O Debleskro Lab 2024 (Sinte-Manouche)

¹ Oun o Hiob rakras pale oun penas kal laba:

² Ah, te voms pale har an ko tsiro, hoy pal mande hi, har an kol bersha, kay o Devel ap mande yak das,

³ har leskri momeli pral miro shero his, oun me yaake an i kali rat nay trouyel djom,

⁴ har his man gomme miri tseli zoor, oun o Devel miro maal his, oun yak das ap miro kheer,

⁵ har o zorelo Devel mantsa his, oun mire čave troul mande his,

⁶ har dan mire groumya oun bouzya boudeder har doha thoud, oun mire djeteskre rouka yaake boud djet dan, te nashas lo har pani vin dran o bar, kay van i djeteskre drake tiknes kerdo!

⁷ Har djom me pre an o foreskro baro voudar, oun beshom man pash i pralstunende,

⁸ dikan man i terne oun djan ap i rig, oun i phoure stan pre oun ačan tardo.

⁹ I pralstoune rikran pengre laba pale, oun čivan pengro vast ap o mouy.

¹⁰ Ninna i bare morsha o forestar rakran bouder gar, oun rikran pengro mouy.

¹¹ Hakeno, kay shounas man, sharas man. Oun koon man dikas, rakras lačo koova pral mande.

¹² Me vom ko čorveleske ap i rig, kay ap mande gole das. Oun ko čavo, koleskro dad meras, oun leske kek bouder koy his, koleske homs me koy.

¹³ Kolla, kay merans, te voms gar koy, rakran i barht pral mande vin. Oun me krom, te givas o dji kolatar, kolakro rom meras.

¹⁴ Hako tsiro krom, hoy čačo hi. Oun miro čačepen his ap mande, har te vals lo miro ripen oun miri stadi.

¹⁵ O koreleske homs me har i yak, oun i heri koleske, kay nay nashell gar.

¹⁶ O čorveleske homs me har i dad, oun lom koleskro koova an o vast, kay i vi-themari his.

¹⁷ I čilačeske dom i danda paash, oun tserdom koles dran leskro mouy, hoy kamas lo te rhal.

¹⁸ An ko tsiro patsom, te vau i phouro morsh, oun merau an o lačo phourepen mank mire čavende.

¹⁹ Me homs har i rouk, koleskre draba djan bis pash o pani, oun koleskre kashta venn sapeno haki rat.

²⁰ Pash i menshende homs hako tsiro an-diklo, oun lom pale te pale nevi zoor.

²¹ Yon shounan, hoy man penepaske his. Oun rakran či, bis te penom lenge, hoy te krenn le.

²² Pal mande penas bouder kek vavar čomone. Mire laba peran ap lende tele har lačo brishin.

²³ Yon dikan ap mande, te rakrap, har kamenn le, te vell brishin. oun piyan mire laba, har i harhetikri phoub o brishin piyell.

²⁴ Te his lenge ropaske, som kamles ap lende. Oun har dikom lačes ap lende, lan le pale nevi zoor.

²⁵ Me homs lengro pralstouno, oun rodom lenge o drom vin. Oun djivom mank lende har i baro ray mashkral peskre lourdende. Oun rakrom lačes kolentsa, kolenge ropaske his.