Hiob 28 - O Debleskro Lab 2024 (Sinte-Manouche)

¹ Tel i phoub nay hatsenn le roup. Oun o sonakay, les hi i platsa, kay thovenn le les vin.

² Dour dran i phoub lenn le saster vin, oun lolo saster dran i barra, hoy venn tato kerdo, te vell o lolo saster vin.

³ O mensho lell i momeli peha, te nay boudrell lo tel i phoub, oun rodell kote an i barra, yaake dour har djala, pal kova, hoy khatedo hi an o tamlepen.

⁴ Dour krik foun kotar, kay menshe djivenn, krenn le i grouba, hoy djal dour tele, kote kay kek mensho ap i raysa djal. Oun pandenn pen ap i shello, oun moukenn pen tele an koy grouba, dour krik i vavar menshendar.

⁵ Pral ap i phoub vell djob baro. Oun tella an i phoub rissrenn le lauter trouyel, yaake te dikell kova vin har pal i yag.

⁶ An kol bare barra an i phoub hatsenn le kouč blauete barra, oun an i čik sonakay.

⁷ Kek adlari prindjrell o drom pash kol barra, oun kek čirklo, koles i feteder yaka hi.

⁸ Kek levo oun kek vavar divyo firho djas ap ko drom, hoy kote djal.

⁹ O mensho phagell an kol bare zorele barra, oun rissrell i tsele berge trouyel.

¹⁰ Dren an kol barrengre berge krell lo dromma, oun hatsell kote boud kouč koova.

¹¹ Yob dikell kol tikne panya, hoy venn dran i phoub, oun venn lengste panya. Oun ko kouč koova an i phoub, hoy kek dikas, lell lo vin, oun anell les kote, kay vell lo diklo.

¹² Koon nay penell mange, kay nay vell o gosvepen hatslo? Kay nay hatsah vin, har te djivas i gosevo djipen?

¹³ Kek mensho djinell, har boud o gosvepen moldo hi. Ap i phoub, kay i menshe djivenn, vell lo gar hatslo.

¹⁴ O telstunepen penell: An mande hi lo gar! Oun o baro pani penell: Pash mande hi lo vitar gar.

¹⁵ I menshe nay ginenn gar o gosvepen, nay denn kek roup vitar kek sonakay, te playsrenn le leske.

¹⁶ O gosvepen hi boudeder moldo har o lačeder sonakay oun kouč blauete barra.

¹⁷ O sonakay oun kouč glaso hi gar yaake kouč har o gosvepen. Vitar kek shoukar sonakangre čare nay dell yek, te lell lo o gosvepen.

¹⁸ Koralle oun kristallo hi gar doha moldo, te ginell yek lentsa o gosvepen. Kones gosvepen hi, hi bravleder har kones kouč mirklia hi.

¹⁹ Ninna ko kouč djelto bar dran o them Etiopia oun ko lačeder sonakay hi gar yaake boud moldo har o gosvepen.

²⁰ O gosvepen, foun kay vell lo? Oun kay nay hatsah mer vin, har te djivas i gosevo djipen?

²¹ Khatedo hi lo glan i yaka halauterendar, kay djivenn. Ninna i čirkle an o bolepen nay dikenn les gar.

²² Oun an o moulengro them vell penlo: Mer shounam mare kandentsa, har vas pral leste rakedo.

²³ O Devel kokres hi kova, kay djinell o drom, hoy anell pash o gosvepen. Oun yob kokres djinell, kay o gosvepen khere hi.

²⁴ Yob hi kova, kay dikell ap i tseli phoub, yaake dour har djal li, oun lauter, hoy ap late hi.

²⁵ Har yob o dourho peskri zoor das, har lo penas, bis kay ko baro pani nay djal,

²⁶ har yob o brishin peskre tsirya das, oun o bolepaskri yag peskro drom sikras,

²⁷ koy dikas lo, har boud moldo o gosvepen hi. Yob las les an i yak oun penas: O gosvepen hi lačo!

²⁸ Yob penas ap o mensheste: Savo mensho hi gosevo, kay rikrell pes o Debles glan i yaka pash kova, hoy lo krell. Savo mensho hayvas, har te djivell lo o gosevo djipen, kay rikrell pes pale o čilačepastar.