Hiob 27 - O Debleskro Lab 2024 (Sinte-Manouche)

¹ Oun o Hiob rakras pale oun penas kal laba:

² O Devel kras, te lap gar miro čačepen. O zorelo Devel kras miro djipen shoutlo. Me dau man sovel pash o djido Debleste:

³ Yaake rah har an mande gomme djipen hi, oun o dourho o Deblestar an miro nak hi,

⁴ rakrell miro mouy kek rhorhepen, oun miri čip kokres kova, hoy čačo hi.

⁵ An kek tsiro kamau, te dap t'men čačes. Bis te merau, penau me: Kek doosh anom ap mande.

⁶ Me hom an o čačepen. Ap kova rikrau man zoreles, oun ačau koy pashel. Kek dives penell miro dji mange: Kova hoy kral, his gar mishto.

⁷ Koon kamell mange čilačepen, leske te djal har i čilačenge! Koon stakrell khatar mande pre, leske te djal har kolenge, kay gar an o čačepen hi!

⁸ Ap hoy nay rikrell pes kova, kay kamell či o Deblestar te djinell, te vell ko tsiro, kay lo hounte merell, oun o Devel leskro djipen lestar lell?

⁹ Te vell i pharo tsiro pral leste, oun yob dell gole ap o Debleste, shounell o Devel palle? Na-a!

¹⁰ Yob hi gar savo mensho, kay hatsell peskri barht pash o zorelo Debleste, oun dell hako tsiro gole ap leste.

¹¹ Me kamau t'mende te sikrell, hoy o zorelo Devel krell. Kamau vin te rakrell, hoy an leskro dji hi.

¹² T'mer dikan kava lauter ninna! Hoske rakrenn t'mer palle savo dinelo koova?

¹³ Kova hi koy phagi, hoy dell o zorelo Devel i čilačeske, koleske, kay i vavaren zoryah tele rikras:

¹⁴ Te venn leskre čave ninna boud, merenn boud lendar an o kourepen. Vavaren hi gar doha te rhal.

¹⁵ Kolla lendar gomme pral ačenn, kolen marell i djoungelo nasslepen. Oun lengre romya nay rovan gar pral pengre moule romende.

¹⁶ Ninna te las yob peske yaake boud roup khetne har čik, oun boud boud koola an-ripaske,

¹⁷ vell i vavar, yek, kay an o čačepen tardo hi, oun hidjrell kol koola. Oun ko roup lenn kolla, ap kolende kek doosh hi.

¹⁸ Leskro kheer, hoy lo peske kras, hi gar zorelo tardo – hi har i spinnakri netsa, oun har sau patyengro kheer, hoy yek peske kras, kay dell garda ap i kotar phoub.

¹⁹ Braveles čivell lo pes tele, – i letsto kopo! Te krell lo peskre yaka pale pre, hi bouder či koy.

²⁰ I daar vell pral leste har i zorelo pani. An i rat lell les i bari phourdepen peha.

²¹ I tato zorelo dourho hadell les pre, hidjrell les krik, oun phourdell les krik dran peskro kheer.

²² Ko dourho phourdell ap leste peskri tseli zoryah, oun moukell gar tele. Oun ko mensho marell pes tele, te nashell lo peske glan leskri zoor.

²³ Ko dourho hi har yek, kay dell i vasta pral leste khetne, oun dell shol har te sals lo pral leste, kay lo ninna djal.