Hiob 26 - O Debleskro Lab 2024 (Sinte-Manouche)

O Hiobeskro orhtato rakepen

¹ Oun o Hiob penas koy pre:

² Patseh, kava rakepah val ap i rig mange, i morsheske, koles kek zoor bouder hi, oun kay nay rikrell pes bouder gar ap i herya?

³ Har shoukar penal mange, hoy te krap, mange, i morsheske, koles kek gosvepen hi! Oun sikral mange boud koova, hoy hounte djinap oun hayvap!

⁴ Koon penas touke, te rakress yaake? Koon čivas touke kal laba an o mouy?

⁵ An o moulengro them, an i panya tel i phoub trissenn i moule i daryatar.

⁶ O moulengro them hi pre čakedo čiddo glan o Debleste. Či khatrell les glan leskre yaka.

⁷ O Devel kras o bolepen bourhles pral kova, kay či hi, oun pandas i phoub kote pre, kay či hi.

⁸ Yob pandell o brishin dren an i volke, oun kolla djan gar paash, fothe pharo o pani ninna hi.

⁹ Yob khatrell peskri beshepaskri pal pesse volke.

¹⁰ Yob čivas i bogo pral o baro pani yek rigyatar ap i vavar, te vell o dives oun i rati gar khetne.

¹¹ Te dell o Devel kol bergen trad, hoy hidjrenn o bolepen, trissenn le i daryatar.

¹² Peskri zoryah kras lo o baro pani, te vell lo divyo, oun yob hayvas, har nay das lo o Rahab moulo.

¹³ Yob phourdas i volke krik, oun o bolepen vas shoukar. Oun leskro vast das ko sik panyeskro sap moules čourye.

¹⁴ Dik, kava hi či har i tikno kotar kolestar, hoy yob kras. Oun hoy lestar shounam, hi gar boudeder har i tikno lab. Kek nay hayvell, har baro leskri zoor čačepah hi!