Hiob 24 - O Debleskro Lab 2024 (Sinte-Manouche)

¹ Hoske dell o zorelo Devel kek tsirya, kay rakrell lo o čačepen vin pral i čilačende? Kolla, kay les prindjrenn, dikenn gar, har oun kaana yob kova krell.

² O čilače čivenn kol barra ap i rig, hoy sikrenn har baro yekeskro them hi. Oun yon čorenn bakre oun anenn len ap pengro kotar phoub.

³ Yon lenn penge i bourika kolendar, kay len kek dad bouder hi, oun lenn koy groumni kolatar, kolakro rom meras, bis te playsrell li peskri siyaan.

⁴ Yon tradenn i čorvelen o dromestar tele. Oun kolen či hi, kolla hounte khatrenn pen lendar.

⁵ Yaake har i divye bourike hounte djan le an o moulo tato them, te rodenn le rhapen, kote, kay gar boud bares vell, te hi len čomone, hoy denn le pengre čaven te rhal.

⁶ Ap i harhetikri phoub vavarendar rodenn le djob, hoy pral ačas. Oun i drakengre roukendar, hoy i bravelen hi, lenn le penge kol drake, hoy bistedo van.

⁷ An i rati hi len kek koola, te čakrenn le pen, kek plarhta, hoy len tato rikrell an o shil.

⁸ Te dell bari brishin an i berge, venn le sapeno, oun hounte beshenn tel i bare barra, te khatrenn le pen glan o brishin.

⁹ Čilače menshe lenn zoryah i čorveli dake o ternepen dran i moussya krik, koleskro dad meras. Oun yon penenn ap late: Me dau les touke pale, te playsral mange tiri siyaan.

¹⁰ I čorvele djan trouyel, oun len hi či an-ripaske, oun hounte bokenna, ninna te hidjrenn le o khetne pandlo djob.

¹¹ Mank barra krenn le djet, oun stakrenn i drake, te krenn le mool, oun koy pashel hounte troushenn le.

¹² An i forya denn kolla gole, kay hi doukedo oun merenn. Oun o Devel dell kek yak ap ko narvelo koova, hoy i čilače krenn.

¹³ Čilače menshe kamenn gar o dives, oun djan gar ap dromma, ap kolende o kham perell. Save dromendar djan le tele.

¹⁴ Glan te djal o kham pre, stell o marepaskro pre oun marell o čorveles, koles či hi. Oun rati djal o marepaskro trouyel, te čorell lo.

¹⁵ Kova, kay kamell pash o vavareskri romyate te djal, lourell ap i rat. Yob penell peske: An i rat nay dikell man kek yak. Oun čivell i diklo glan peskro mouy.

¹⁶ An i rat phagenn i čorepangre an i khera dren. Oun te vell o dives, khatrenn le pen, oun kamenn gar, te venn le diklo.

¹⁷ Kali rat hi lenge lauterenge har vavarenge i tsalla. An i rati hi len kek daar.

¹⁸ O čilačo vell sik krik hidjedo har i patri ap o pani. Ap leskro kotar phoub hi i praasepen čiddo. Pash peskre drakengre rouka djal lo bouder gar.

¹⁹ Yaake har o gib krik djal, te vell o kham oun o tatepen, yaake djan kolla an o moulengro them, kay o Debleskro dromestar tele djan.

²⁰ Saves bistrell ninna leskri day. I kirme rhan pen čales ap leste. Kekeske vell lo bouder an o shero. Yaake phagell o čilačepen khetne har kasht.

²¹ Yob randas kolatar, kay kek čave nay las, kolake kek čavo boldo vas. Oun kolake o rom meras, lake kras lo kek lačepen.

²² Peskri zoryah lell o Devel o djipen krik kolendar, kay boud penepaske hi. Te stell lo pre, hounte darenn le pengro djipaske.

²³ Yob moukell len te patsell, te djal lenge či. Oun lell hako koova an o yak, hoy le krenn.

²⁴ Kol an-dikle van baro i tikno tsireske. Oun ap yek kopo hi le bouder gar koy. Yon čivenn pengro shero tele har i blouma hoy merell. Oun har o shero ap o djob venn le tele činlo.

²⁵ Hi kova gar yaake? Koon kamell man kanna i rhorheneske te krell, oun sikrell, te his kova gar čačo, hoy me penom?