Hiob 23 - O Debleskro Lab 2024 (Sinte-Manouche)

O Hiobeskro eftato rakepen

¹ Oun o Hiob penas koy pre:

² Ninna kava dives rakrau me dran i doukedo dji. O Debleskro vast hi phares ap mande čiddo, te hounte lap phares dourho.

³ Kamoms te djinap, har nay hatsau les, oun har nay vau kote, kay lo o čačepen vin rakrell!

⁴ Palle anoms miro koova glan leste, oun penoms leske kova lauter, hoy nay rakrell mange mishto.

⁵ Kamoms te djinap, hoy yob koy pre penell, oun te shounap, hoy les hi mange te penell.

⁶ Čingrals lo mantsa an peskri bari zoor? Na-a, yob shounals mishto ap mire laba.

⁷ Palle anoms miro čingepen glan leste, oun sikroms, te hom an o čačepen tardo. Oun o Devel, miro čačepaskro ray, dikals, te hi kek doosh ap mande, oun moukals man te djal hako tsireske.

⁸ Te rodau me o Debles glan mande, hi lo gar koy, te rodau les pal mande, hayvau me lestar či.

⁹ Te djau serves, dikau či, hoy yob krell, te rissrau man ap i čači rig, dikau les kote vitar gar.

¹⁰ Yob djinell havo drom me djau. Dikals lo palla, har djivau, hatsals lo vin, te hom djoudjo har sonakay.

¹¹ Me rikrom mire pire ap leskro drom, oun ačom ap leste, oun djom gar tele lestar.

¹² Me rikrom man ap hako lab, hoy vas dran leskro mouy. Oun rikrom halauter an miro dji, hoy lo rakras.

¹³ Yob ačell koon yob hi. Koon nay anell les kolestar krik, hoy lo kamell te krell? Kova, hoy kamell lo te krell, kova krell lo.

¹⁴ Ava, yob krell kova doureder, hoy les mantsa glan his. Oun les hi boud koova mange an peskro dji.

¹⁵ Doleske taprell man i traash glan leste. Te vell kova mange an o shero, darau zoreles lestar.

¹⁶ Ava, o Devel kras miro dji darenes, o zorelo Devel kras mange bari traash.

¹⁷ Hi gar i kali rat, vitar gar ko tamlepen glan mande, te merap i daryatar. Na-a, darau o Deblestar.