Hiob 21 - O Debleskro Lab 2024 (Sinte-Manouche)

O Hiobeskro shobto rakepen

¹ Koy pre penas o Hiob:

² Shounenn mishto, hoy penau! Te shounenn t'mer man, palle djal mange feteder an miro dji.

³ Mangau t'men, moukenn man te rakrell! Pal kova nay sanenn pral mande!

⁴ Čačepah, miro čingepen hi gar i mensheha. Ninna te vals yaake, hoske te vap me gar rhoyedo?

⁵ Dikenn ap mande! Oun t'mer krenn bare yaka i trashatar, oun čivenn t'maro vast glan o mouy!

⁶ Te vell mange an miro shero, har djoungeles mange djal, taprell man i daar, oun moukell man te trissell.

⁷ Hoske ačenn kol čilače djido venn phouro, oun lengri zoor vell bareder?

⁸ Lengre čave djivenn troul lende trouyel. Oun yon dikenn, har lengre čavengre čave baro venn.

⁹ Yon djivenn an lačepen an lengre khera kek daryah. Oun o Devel dell len kek phagi.

¹⁰ Lengre gourma stenn ap i groumya, oun kolla lenn terne, kolendar kek merell.

¹¹ I čilače bičrenn lengre čaven vin khelepaske. Oun yon stenn trouyel har tikne bakre.

¹² Oun givenn pash o bashepen ap i tikne pauke oun doryengre bashepangre, oun khelenn barhteles pash o bashepen ap i tikne phourdepangre.

¹³ Kol čilačen hi i shoukar djipen. Oun kek doukentsa merenn le, oun djan an o moulengro them.

¹⁴ I čilače penenn ap o Debleste: “Dja touke mendar! Mer kamah či tire dromendar te djinell.

¹⁵ Koon hi o zorelo Devel, te boudras mer leske? Hoy hi kova menge moldo, te mangas les an?”

¹⁶ Kal menshe penenn, te hi len pengri barht an pengre vasta. Me patsau gar, te hi kova čačo, hoy rakrenn yon penge dren.

¹⁷ Gar boud kope meras i čilačo, glan te vas lo phouro. Gar boud kope vas i bibarht pral leste. Gar boud kope anas o Devel i phagi pral leste an peskri rholi,

¹⁸ oun phourdas les krik, har phourdell i dourho o phouss krik, oun har hidjrell i zorelo phourdepen o čik krik.

¹⁹ T'mer penenn, te anell o Devel i phagi pral i čavende ko čilačestar. Me penau: Yob hounte dals koy phagi koleste, kay čilačo koova kras, te hayvell yob kova,

²⁰ oun dikell peskre yakentsa peskri bibarht, oun hayvell kokres, har kova hi, te vell o zorelo Debleskri rholi ap leste.

²¹ Hi lo moulo, hi leske yek, har djal leskre čavenge.

²² Nay penell i mensho o Debleske, har čomone hounte vell – leske, kay hi o čačepaskro ray pral halauterende, ninna pral i pralstunende?

²³ Ko yek merell, te hi lo sasto oun zorelo, oun djivell i shoukar djipen kek daryah.

²⁴ Yob hi thoullo lačo rhapastar, oun leskre kokale hi zorelo.

²⁵ Ko vavar merell pal i pharo djipen oun dikas kek barht.

²⁶ Khetne hi le tel i phoub, oun i kirme čakrenn len.

²⁷ Me hayvau, havo koova an t'mare sherya trouyel djal, oun har kamenn man te doukrell.

²⁸ T'mer penenn: “Hoy vas dran o kheer ko rayestar, kay yaake boud čilačepen kras?”

²⁹ Poučan t'mer gar kolen, kay ap t'maro drom van? Patsenn t'mer gar, hoy yon dikan oun shounan?

³⁰ Ap ko dives, kay vell i bibarht, kay vell o Debleskri rholi pral i menshende, ačell o čilačo djido.

³¹ Kek penell o čilačeske an o mouy dren, havo djoungelo koova yob kras. Kek dell les ko čilačepen pale, hoy lo ap i vavarende kras.

³² Ap ko dives, kay vell lo ap o handako anlo, denn morsha yak ap leskri grufta.

³³ Te vell lo kote anlo, djan boud boud menshe pal leste oun glan leste. Oun yaake har lo paskedo vell, hi kova leske shoukar.

³⁴ Patsenn t'mer, kay t'mare laba krenn, te djal mange feteder an miro dji? T'mare laba hi či-moldo! Kova, hoy mange penenn, hi či har rhorhepen!