Hiob 20 - O Debleskro Lab 2024 (Sinte-Manouche)

O Sofar: Leskro douyto rakepen

¹ Oun o Sofar dran o them Naama penas koy pre:

² Mange djan yaake boud laba an o shero trouyel; doleske hounte rakrap me touha pale:

³ Tou praasal man tiro čingepah. Shoun, me djinau, hoy te penap touke koy pre.

⁴ Djinal tou gar hako tsiro, yaake rah har i mensho ap kay phoub hi,

⁵ vell koy barhteli gole kol čilačendar kokres i tikno tsiro shounlo. Oun koy barht kolestar, kay kamell či o Deblestar te djinell, djal sik trouyel.

⁶ Ninna te vell lo yaake baro, te djal lo bis pash o bolepen pre, oun leskro shero pral bis pash i volke,

⁷ vell lo krik lino, oun vell pale čik. Kek tsireske vell lo bouder hatslo. Oun kolla, kay prindjran les poučenn palle: Kay hi lo?

⁸ Yob djal krik har i souni, oun vell bouder gar hatslo. Har kova, hoy yek souni das, bouder gar koy hi, yaake ačell či lestar.

⁹ Kolla, kay dikan les, dikenn les bouder gar. Kote, kay djivas lo, hi lo bouder gar.

¹⁰ Leskre čave hounte denn kova pale, hoy lengro dad i čorvelendar čoras.

¹¹ Ninna te hi lo gomme terno oun zorelo, hounte merell lo, oun vell an i čik čiddo.

¹² An leskro mouy hi o čilačepen har i goudlo rhapen, hoy yob khatrell tel peskri čip,

¹³ oun rikrell les kote yaake rah har djala, te piyell lo i rah tsiro leskro goudlepen.

¹⁴ Te vell ko rhapen an leskro per, nashrell lo peskro goudlepen, oun vell har i sapeskro čounger, hoy anell o merepen.

¹⁵ Leskro randedo koova hi har i rhapen, hoy hounte čadell lo pale vin. O Devel lell ko randedo koova lestar krik.

¹⁶ Ko čilačo koova, hoy lo kras, hi an leste har sapeskro čounger, oun marell les har i čilačo sap, kay dandras les.

¹⁷ Yob dikell bouder či o bravlepastar an kava them, ko boud gvin oun thoud, hoy har lengste panya nashenn.

¹⁸ Kova, hoy lo peske khetne anas, hounte dell lo pale, oun nay rikrell les gar. Oun kova, hoy lo dren paras, krell les gar barhtelo.

¹⁹ I čorvelen rikras lo tele, oun vas lenge gar ap i rig. Yob tradas menshen dran pengre khera, te lell lo peske kol khera, hoy yob gar kras.

²⁰ An kek tsiro nay las lo doha. Doleske ačell leske ninna či foun leskro kouč koova.

²¹ Yob rhas lauter an peste dren, moukas či pral i vavarenge. Doleske ačell leskro shoukar djipen gar.

²² An ko tsiro, kay les an lauter boudeder har doha hi, vell i daar pral leste. I phari bibarht dell les tele.

²³ Ap ko tsiro, kay krell lo peskro per pherdo, bičrell o Devel peskri zoreli rholi ap leste, oun moukell lat har brishin tele ap leste te perell.

²⁴ Ninna te nay nashell lo glan o sasterno rharo, dell les yek tele karye.

²⁵ Ko faylo vell an leskro bouko karye dino, oun dran o doumo djal lo vin. Bari traash taprell les.

²⁶ Leskro tselo kouč koova vell paash kerdo. Oun i yag, hoy kek mensho čivas, rhačrell les pre, oun kolla, kay an leskro kheer pral ačan.

²⁷ O bolepen rakrell vin, havi doosh yob ap peste anas, oun i phoub hadell pes oun penell: Tou hal čilačo.

²⁸ Leskro tselo bravlepen an leskro kheer vell krik lino – ap ko dives, kay vell o Debleskri rholi pral i čilačende har divye panya.

²⁹ Kava hi, hoy o Debles i čilačenge hi, kova, hoy lo lenge glan dikas.