Hiob 2 - O Debleskro Lab 2024 (Sinte-Manouche)

O Hiob lell i pharo nasslepen

¹ Oun vas o dives, kay van i bolepangre pale khetne pash o baro Debleste oun čivan pen tardo glan leste. Oun o beng his ninna pale mashkral lende.

² Oun o baro Devel penas ap o beng: “Foun kay veh tou?” Oun o beng penas ap leste: “Vau i phoubyatar. Kote djom trouyel.”

³ Oun o baro Devel poučas o bengestar: “Dal tou ninna yak ap miro boudepaskro, o Hiob? Kek vavar hi ap i phoub, kay hi yaake har kova. Yob hi an o čačepen tardo, oun kek doosh hi ap leste. Yob mangell man an, oun rikrell pes dour krik o čilačepastar. Ninna kanna anell lo kek doosh ap peste, kay tou mandar kamal, te anap les an i bibarht, ninna te kras lo či.”

⁴ Oun o beng penas ap o baro Debleste: “Lauter, hoy i menshes hi, dell lo peskro djipaske.

⁵ Hade tiro vast oun tape leskre kokale oun leskro mass an! Palle dikeh, te praasell lo tout glan hake menshende!”

⁶ Kote penas o baro Devel ap o beng: “Mishto, dau les an tiro vast. Leskro djipen ma tape an!”

⁷ Kote djas o beng vin o baro Deblestar, oun das o Hiobes i djoungelo nasslepen ap peskro mass, hoy rhandjras oun doukas leske foun o shero bis tele pash i pire.

⁸ Oun o Hiob las i kotar i paash-dino khorestar, te rhandjrell lo pes koleha. Oun yob his beshdo mashkral i yagakri čik.

⁹ Kote penas leskri romni ap leste: “Rikreh tou gomme ap tiro patsepen? Pen tout o Deblestar tele oun mere!”

¹⁰ O Hiob penas ap late: “Tou rakreh yaake har i dineli čay rakrell. O lačepen lam o Deblestar. Las mer gar ninna o čilačo koova lestar?” Ninna te vas kova lauter yaake, anas o Hiob kek doosh ap peste oun vitsras o Debleske kek čilačepen glan.

O Hiobeskre triin mala

¹¹ O Hiobes his triin mala. Har shounan yon foun koy bibarht, hoy vas pral o Hiob, van le pash leste khetne, hakeno foun kotar, kay yob djivell: O Elifas dran o foro Teman, o Bildad dran o them Shoua, o Sofar dran o them Naama. Oun yon kran penge vin, te djan le pash leste, te sikrenn le leste, har khaytell lo len, oun te penenn le leske lače laba.

¹² Har dikan le les foun doural, prindjran le les gar bouder pale. Oun yon rovan phares. Oun zoryah tserdas hakeno lendar peskre koola pestar tele, oun kras len paash. Oun yon vitsran čik pre oun ap pengre sherya.

¹³ Oun yon his kote pash leste ap i phoub beshdo efta divessa oun efta ratsya. Oun kek lendar rakras leha. Yon dikan, leskre douka his baro oun pharo.