Hiob 19 - O Debleskro Lab 2024 (Sinte-Manouche)

O Hiobeskro pančto rakepen

¹ Oun o Hiob penas koy pre:

² Har rah kamenn t'mer mange miro dji te phagell, oun man t'mare labentsa paash te krell?

³ Deesh kope praasan man kanna, oun ladjenn t'men gar, te doukrenn man.

⁴ Ninna te vals man čačepah gar čačes, vals kova miro koova.

⁵ Čačepah, t'mer patsenn, te han feteder har me, oun kamenn mange te sikrell, te hi miri doosh, hoy anas man an i ladj!

⁶ Dikenn t'mer gar dren, te hi kova o Devel, kay djas gar mishto mantsa trouyel? Hi yaake, har te taprals lo man an i netsa.

⁷ Te dau vin gole Avenn ap miri rig, shounell man kek. Ninna te dau zoreles gole, dell kek man miro čačepen.

⁸ Ap miro drom čivas lo yaake boud barra, te nay djau gar pral vergel. Oun yob moukell man an o kalepen miro drom te hatsell.

⁹ Yob las miro tselo bravlepen mandar, ninna miro an-dikepen pash i menshende.

¹⁰ Yob dell man khetne haki rigyatar, sik hom gar bouder. Yob kras, te patsap bouder gar ap o lačepen, te dell lo man kova.

¹¹ Oun peskri rholi moukas lo pral mande pre rhačell, oun rikrell man har savo morsheske, kay kamell leske čilačepen te krell.

¹² Hi yaake, har te bičrals yob peskre lourden, te djan le ap mande. Yon kran penge i drom pash mande, oun čivan pen pre troul miro kheer.

¹³ Yob rikras mire phralen dour mandar krik. Oun kolen, kay me lačes prindjrom, krenn yaake, har prindjrans le man gar.

¹⁴ Mire menshe venn gar pash mande, oun mire mala bistran man.

¹⁵ Kolla, kay mantsa an miro kheer djivenn oun kol djouvya, kay mange boudrenn, an lengre yaka hom har i vi-themari, har yek, koles prindjrenn yon gar.

¹⁶ Te dau gole ap miro boudepaskro, shounell lo gar, ninna te mangap les zoryah.

¹⁷ Miro dourho dran miro mouy khandell yaake, te rissrell pes miri romni mandar krik. Ninna mire phralenge hom i khand.

¹⁸ Ninna i čavenge hom či moldo. Te kamau me pre te stell, sanenn le pral mande.

¹⁹ Mire lače mala dikenn tele ap mande. Oun kolen, kay me o djiyestar kamom, sikrenn mange o doumo.

²⁰ Mire moussya oun herya hi sane har kashta. nashrom halauter, kokres miro djipen ačas.

²¹ Mire mala, krenn t'mare djia mange pre! Avenn mange lačes! O Debleskro vast das man!

²² Hoske lenn t'mer man palla har o Devel kova krell? Kran t'mer mange gomme gar doha douka?

²³ Kamoms, te vans mire laba an i liil činlo, te venn le gar bistedo.

²⁴ Kamoms, te venn le i sasteha dino an i baro bar, te ačenn le hako tsireske!

²⁵ Me djinau, te djivell o Devel, kova, kay miro koova an peskro vast lell. Oun an o tsillo, kay o čačepen vin rakedo vell pral kay phoub, hi yob miro rakepaskro.

²⁶ Ninna te hi miro mass yaake doukedo oun vom yaake sano, vell ko tsiro, kay dikau miro Debles.

²⁷ Ava, dikau les mire yakentsa. Oun yob hi mange kek, kay prindjrau gar. Miro dji nashell leste palla.

²⁸ Te poučenn t'mendar: “Har nay lah les palla? Havo koova nay anah ap leste pre?”

²⁹ Palle darenn t'men o rharestar! Yek, kay savi doosh ap peste anell, pral leste vell o rharo. Palle djinenn t'mer, te hi o Devel o čačepaskro morsh.