Hiob 18 - O Debleskro Lab 2024 (Sinte-Manouche)O Bildad: Leskro douyto rakepen 1 Oun o Bildad dran Shoua penas koy pre: 2 Har rah kamenn t'mer gomme doureder te rakrell? Rakrenn t'mare djiyentsa! Oun palle kamah mer khetne te rakrell! 3 Hoske rikreh tou men yaake narvelo har firhe? Hoske ham mer dinelo an tire yaka? 4 An tiri rholi doukreh tout kokres! Patseh, i phoub hounte vell i moulo them, oun i bare barra hounte djan yek rigyatar ap i vavar, te vell diklo, kay hal tou an o čačepen? 5 Na-a, o djipaskri momeli o čilačestar djal vin. Oun leskri yag rhačell bouder gar. 6 An leskro kheer vell tamlo. Oun koy momeli pral leste djal vin. 7 Leskre herya, kolentsa yob zoreles pre stakras, hi palle bouder kek zoor an lende. Oun yob perell pral kova, hoy las lo pes glan. 8 Leskre pire taprenn pen an i netsa, oun yob perell an i čakedi grouba. 9 Pandle dorya rikrenn leskro piro zoreles oun moukenn les gar bouder vin. 10 Khatedo ap ko drom, kay lo djal, hi i dori vin čiddo, te taprell lo les. 11 Troul leste trouyel vell haki rigyatar bari traash, oun lell les palla, kay yob ninna stakrell. 12 I bok lell leske leskri zoor krik. I bibarht hi tardo pash leste, har te vals li leskro maal. 13 O nasslepen rhal les pre, i merepaskro nasslepen rhal leskre moussya oun herya krik. 14 O merepen tserdell les vin dran o kheer, kolestar yob patsas, te nay djal leske či. Oun yob vell anlo glan koleste, kay hi o ray pral i moulende. 15 An leskro kheer djivenn palle kolla, kay gar lestar venn. Oun ap leskro kheer venn yagakre barra vitsedo. 16 Yob hi har i rouk: Tella merell leskro drab tele, oun pral venn leskre patria djelto. 17 Kek ap i tseli phoub djinell gomme, koon yob his. Pash hakeneste vell lo bistedo. 18 I phoubyatar, kay i djide djivenn, vas lo tradedo an ko tamlo them, kay i moule hi. 19 Leske ačell kek čavo, vitar kek čavengro čavo mank peskre menshende. Kote, kay djivas lo, ačell kek lendar djido. 20 Te vell o dives, kay vell leskri phagi pral leste, lenn kolla traash, kay kote djivenn, kay o kham pre djal. Oun kolenge ačell o rakepen krik i daryatar, kay kote djivenn, kay o kham tele djal. 21 Čačepah, yaake djal i čilačenge oun kolenge, kay kamenn či o Deblestar te djinell. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.