Hiob 17 - O Debleskro Lab 2024 (Sinte-Manouche)

¹ Man hi bouder kek zoor. miro djipen hi trouyel. Ap mande lourell o handako.

² Hakeno sal pral mande. Oun me hounte dikap, har čingran le ap mande.

³ Hi yaake, har te voms an o stilepen. Mangau tout, playse tou kol love, te vap vin lino! Man hi kek vavar, kay mange mishto rakrell.

⁴ I djia mire malendar kral tou korelo, yaake te nay dikenn le či dren. Doleske moukeh len tou gar zorleder te vell har me.

⁵ Hi penlo: Yek rhal khetne peskre malentsa, oun leskre čave hounte bokenna.

⁶ Kanna vom yek, pral koleste i menshe sapaskre gilya givenn, oun koleske yon an o mouy čoungrenn.

⁷ Mire yaka dikenn bouder gar mishto i doukatar oun ropastar. Mire moussya oun herya hi sano har i kasht.

⁸ Te dikenn man kolla, kay an o čačepen tardo hi, ačell lenge o rakepen krik i trashatar. Oun kolla, an kolende kek doosh hatslo vell, penenn rhoyedes: “Kova djivell gar o Debleha.

⁹ Yek, kay an o čačepen tardo hi, moukell gar tele peskro dromestar. Oun koon i djoudjo djipen djivell, vell zorleder oun zorleder.”

¹⁰ Ninna te vans yon halauter kay glan mande, hatsoms kek gosevo morshes mank lende.

¹¹ Miro djipaskro tsiro hi trouyel. Kova, hoy me mange lauter glan lom, oun hoy miro dji kamas, vas čičeske.

¹² Te hi rati, penenn le, te vals dives. Te vell tamlo, penenn le, te vals o dives sik.

¹³ Hi bouder či, ap kova nay dikaus. Glan mande hi o moulengro them. Kote an o kalepen nay čivau man tele.

¹⁴ Ap i grufta penau: Tou hal miro dad! Ap i kirme: T'mer han miri day oun mire phenya.

¹⁵ Ap havo vavar koova dikap? Koon dikell lačepen mange te vell?

¹⁶ Ko lačepen, ap hoy dikom, djal mantsa an o moulengro them tele, oun vell mantsa khetne an i čik čiddo.