Hiob 16 - O Debleskro Lab 2024 (Sinte-Manouche)O Hiobeskro starto rakepen 1 Oun o Hiob penas koy pre: 2 Boud sau koova shounom me. T'mare lače laba, hoy t'men mange hi, t'mer halauter, krenn les mange gomme phareder! 3 Nay herenn t'mer kanna pre kava dinelo rakepah! Elifas, hoy anell tout yaake pre te hounte rakress palpale? 4 Te vans t'mer ap miri platsa, palle nay rakroms me yaake har t'mer nay kroms bare laba pral t'mende, oun trissloms miro shero pral t'mende. 5 Boud labentsa doms t'menge pale nevi zoor. Oun kova, hoy penoms, krals t'mari douk tikneder. 6 Či, hoy penau, krell miri douk tikneder. oun te rakrau gar, djal mange vitar gar feteder. 7 Čačepah, o Devel las mange miri zoor krik. Tou, miro Devel, lal mange miri tseli familya krik! 8 Oun tou pandal man dren, har te kroms i čilačo koova. Me hom či har hauta oun kokale. Doleske patsenn i menshe, te lom doosh ap mande. 9 Leskri rholi dandras man khetne oun las man palla. Yob sikrell peskre danda, oun peskre yaka dikenn ap mande har te vans le čourya. 10 Menshe venn khetne troul mande, oun dikenn ap mande pre-kerde mouyentsa. Te vell len čomone sapaske denn le man čamedinya. 11 Miro Devel das man o čilačenge an i vasta, kolenge, kay kamenn lestar či te djinell. 12 Djivom an o lačepen, har o Devel das man khetne. Yob tapras man ap miri meen, oun vitsras man tele. Yob čivas man yaake pre, te dell lo ap mande karye. 13 Leskre fayle djan haki rigyatar ap mande. Yob dell man karye an mire bouke dren. Oun les khaytau gar. Miri galla čorell lo vin ap i phoub. 14 Yek dap pal i vavar dell lo an mande dren. Har i kourepaskro nashell lo ap mande. 15 Me sivom mange i gono troul mande, oun hom čiddo kek zoryah an i čik. 16 Miro tselo shero hi lolo miro boud ropah. Tel mire yaka hi kalepen. 17 Yaake hi kova, ninna te krom kek čilačepen, oun mangom miro Debles i djoudjo djiyeha an. 18 Me hom har i morsh, kay vas maredo. I phoub te khatrell gar miro rat, te vell leskri gole hako tsiro shounlo. 19 Ninna kanna hi yek an o bolepen, kay stell mange pre oun vell ap miri rig. Kova, kay mange mishto rakrell, hi an o pralstunepen. 20 Mire mala sanenn pral mande. Mire yaka hi pherde sva, har dikau me pre pash miro Debleste. 21 Yaake har i mensho peskro maleske mishto rakrell, kamoms te rakrell yek mange mishto glan o Debleste. 22 Gar boud bersha hi gomme glan mande, oun me djau ko drom, kolestar kek palpale vell. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.