Hiob 15 - O Debleskro Lab 2024 (Sinte-Manouche)

O Elifas: Leskro douyto rakepen

¹ Koy penas o Elifas dran o them Teman ap o Hiob:

² Te vals čačepah gosevo, rakrals gar save pre-phourde laba! Kava, hoy tou kate rakreh, hi či har i tato dourho.

³ Tou rakreh touke save labentsa, hoy kekeske mishto hi. Tiro rakepen hi či moldo.

⁴ Čačepah, tou kreh har te vals o patsepen ap o Debleste či moldo, oun kreh, te mangell les bouder kek an.

⁵ Pal boud laba khatreh tiri doosh, oun rakreh har i rhorheno rakrell.

⁶ Hi tiro mouy, hoy penell, te hi doosh ap toute. Me hounte penap kova gar. Hako lab, hoy rakreh, sikrell kova.

⁷ Hal tou o ersto mensho, kay boldo vas? Hals tou koy, har kras o Devel i berge?

⁸ Hals tou pashel, har o Devel peskre bolepangre khetne his, oun shounal, hoy kote rakedo vas? Patseh, te hal tou kokres gosevo?

⁹ Hoy djineh, hoy mer gar djinah? Oun hoy hayval, hoy mer gar hayvam?

¹⁰ Mank mende hi ninna phoure morsha, morsha parne ballentsa, kay phoureder van har tiro dad.

¹¹ Dran mende rakras o Devel kamles touha. Yob kamell o douk dran tiro dji krik te lell. Hi kova touke gar doha?

¹² Hoske kereh tou pral har thoud ap i yag? An tire yaka rhačell tiri rholi.

¹³ Ap o Debleste hal rhoyedo. Doleske vell savo rakepen dran tiro mouy.

¹⁴ Hoy hi o mensho, te nay vals lo erligo glan o Debleste? Kek ap kay phoub hi an o čačepen tardo glan leste.

¹⁵ Ninna leskre bolepangren nay patsell lo gar. Oun o bolepen hi gar djoudjo glan leskre yaka.

¹⁶ Har boud boudeder hatsell lo doosh ap o mensheste. O mensho krell djoungelo koova oun hi či-moldo. O čilačepen krell lo, har te piyals lo pani.

¹⁷ Me kamau touha te rakrell. Shoun ap kova, hoy me penau! Kova, hoy me dikom, kamau te penell:

¹⁸ Shounom les goseve menshendar. Lengre phoure rikran les lenge gar pale.

¹⁹ Lenge kokres his o them dino. Kek vi-themari djas mashkral lende peha.

²⁰ I čilačo mensho marell pes tele i daryatar peskro tselo djipen. Kova, kay i vavaren tele rikrell, hi gar boud bersha glan leste.

²¹ An leske kanda shounell lo i gole, hoy krell leske daar. An ko tsiro, kay leske lačes djal, vell o marepaskro pral leste.

²² Yob nay patsell gar, te vell lo dran o tamlepen pale vin. oun dikell o rharo pral leskro shero.

²³ Yob djal kate te kote oun rodell rhapen, oun hatsell či. Oun yob hayvas, te vell i kalo dives pral leste.

²⁴ Daar oun traash perenn ap leste, oun pandenn les dren, har i baro ray an o kourepen i foro dren pandell.

²⁵ Yaake djal ko morsheske, kay hadas peskro vast ap o zorelo Debleste, oun kras pes bares ap leste,

²⁶ oun nashell peskro shereha ap leste, peskro shilto an o vast.

²⁷ Leske djal mishto, oun leskro per hi thoullo.

²⁸ Oun yob djivell an moukle forya, an khera, hoy khetne perenn, kay kek hounte djivell.

²⁹ Yob ačell gar bravelo. Leskro bravlepen ačell gar. Kova, hoy les hi, vell gar bareder ap kay phoub.

³⁰ Yob nay vell gar vin dran o tamlepen, oun hi har ko rouk, koleskre zenele kashta rhačedo venn an i yag. Oun o Devel phourdell ap leste, oun krik hi lo.

³¹ Koon rikrell pes ap čomone, hoy či moldo hi, kova rhorhell pes kokres. oun lell pale, hoy či moldo hi.

³² Yob hi har i rouk, hoy vell djelto glan peskro tsiro, oun hidjrell an kek tsiro bouder zenele patria.

³³ Har i drakengro rouk hi lo, kolestar i drake tele perenn an i tsiro, kay hi le gomme tikno. Oun har ko djeteskro rouk hi lo, koleskre bloume tele perenn, glan te venn drake lendar.

³⁴ Yaake djal i familyenge kolendar, kay djivenn kek Debleha. Yon ačenn kek čaventsa. Oun i yag rhačrell lengre khera pre, hoy kran le kol loventsa, hoy lenge playsedo vas te rhorhenn le.

³⁵ An lengre sherya hi midjak koova. Pral pende oun i vavarende anenn le bibarht. Oun lengre djia hi pherdo phoukepen.