Hiob 14 - O Debleskro Lab 2024 (Sinte-Manouche)

¹ O mensho, boldo i djouvyatar, djivell i tikno tsiro, oun marell pes tele peskro tselo djipen.

² Har i blouma vell lo baro oun merell tele. Yaake har i shatto, hoy vell bouder gar diklo, te djal o kham tele, hi lo bouder gar.

³ Oun savo hom me. Oun tou leh man an o yak, oun aneh man glan i tsillo, te kress o čačepen vin pral mande.

⁴ I tsele menshen hi doosh ap pende. Har nay vell lendar yek, koles kek doosh ap peste hi?

⁵ Tou penal, har phouro i mensho vell, kitse čonna yob djivell. Oun penal, ap havo dives leskro djipaskro tsiro trouyel hi.

⁶ Palle dik lestar krik, mouk les kokres, te nay krell lo peskro diveskri boudi!

⁷ Te dell yek i rouk tele, hi leske gar lauter trouyel. Dran leste nay venn pale neve tikne kashta vin, oun venn boud oun boudeder.

⁸ Ninna te venn leskre draba phouro an i phoub, oun o telstouno kotar merell tele an i čik,

⁹ te perell pani ap leste, vell lo pale zenelo, ninna te hi kova gar boud pani. Oun neve tikne kashta venn dran leste, har te vals lo i terno rouk.

¹⁰ Merell i morsh, hi lo bouder gar. Kek dourho ačell an leste. Kay hi lo?

¹¹ Dran o baro pani nashell o pani vin. Oun o lengsto pani nashrell boud oun boudeder pani, bis te hi lo trouk.

¹² Yaake hi ko mensho, kay čivell pes tele oun merell. Yob stell gar bouder pre. Yaake rah har o bolepen koy hi, vell lo bouder gar djangelo, oun kek djangrell les pre dran peskro sopen.

¹³ Har kamoms, te khatress tou man an o moulengro them, te pandess man kote dren, bis te tiri rholi trouyel hi. Kamoms te moukals man yek tsiro koy, oun palle voms touke pale an o shero!

¹⁴ Te merell i mensho, vell lo palle pale djido? Palle bistroms, har djoungeles mange kanna djal, oun dikoms ap ko tsiro, kay mange feteder djal.

¹⁵ Tou dals ap mande gole, oun me shounaus oun daus pale gole. Oun tiro dji nashals pal mande, koles tou tire vastentsa kral.

¹⁶ Tou dals yak ap mire dromma, dals gar yak, havi doosh me ap mande laus!

¹⁷ Ko čilačepen, hoy krom, pandals khetne har an i possita. Koy doosh, hoy ap mande lom, čakrals tou, te vell li bouder gar diklo.

¹⁸ I berga nay phagell an peste khetne, oun i baro bar hi bouder gar koy, kay lo his.

¹⁹ O pani thovell i barra yaake rah tele, bis te či lendar ačell. Yaake har hidjrenn zorele panya i čik krik, yaake leh tou kova krik, hoy i mensho glan-vi dikell peskro djipaske.

²⁰ Tou vitsreh les tele, te stell lo bouder gar pre. An o merepen hi leskro mouy bouder gar shoukar. Tou bičreh les krik – yob vell bouder gar pale.

²¹ Te venn leskre čave an-dikle menshe, yob djinell kova gar. Te vell tele diklo ap lende, yob hayvell kova gar.

²² Kokres peskro mass doukrell les. Oun les hi ropaske troul peste kokres.