Hiob 13 - O Debleskro Lab 2024 (Sinte-Manouche)1 Kava lauter dikan mire yaka, oun shounan mire kanda. Oun me hayvom les. 2 Yaake boud har t'mer djinenn, djinau me ninna, An či krenn t'mer mange čomone glan. 3 Gar t'mentsa, na-a, o zorelo Debleha kamau te rakrell. glan leste kamau miro koova glan te anell. 4 T'mer čakrenn o čačepen o rhorhepah, han dramangre, kay či-moldo hi, – t'mer halauter. 5 Kamoms, te rikrans t'mare mouya! Palle dikans yaake vin, har te vans gosevo. 6 Shounenn mishto, har me miro koova glan anau! Oun denn yak, hoy miro mouy penell! 7 Kamenn t'mer o Debleske te rhorhell, oun rhorhepen te rakrell, te vell lo an o čačepen? 8 Kamenn t'mer t'men ap leskri rig te čivell? Kamenn t'mer leske mantsa an o čingepen te djal? 9 Patsenn t'mer, te djal kova t'menge mishto, te lell lo t'men an o yak? Moukell lo pes t'mendar te rhorhell, har te vals lo i mensho? 10 Te čivenn t'mer t'men čorrhanes ap leskri rig, čačepah, palle sikrell lo t'men i zorelo rakepah, te hounte vell kova gar yaake kerdo. 11 Te hadell lo pes, taprell t'men i traash! Oun bari daar moukell lo ap t'mende te perell. 12 T'maro gosevo rakepen hi gar boudeder moldo har yagakri čik. Kova hoy t'mer kate glan anenn, rikrell gar feteder har khera dran čik. 13 Rikrenn t'mare mouya, oun moukenn man te rakrell! Oun kova, hoy palle pral mande vell, mou vell lo! 14 Hoske rikrap ap miro djipen? Me dau gar yak ap miro djipen. 15 Mou marell lo man, man hi či te nashrell. Me djom čače dromma; oun kova kamau me leske an o mouy te penell. 16 Te vap me glan leste, sikrell kova, te hi kek doosh ap mande. Kek douy djiyentsa vell glan leste. 17 Shounenn mishto, hoy penau! Denn yak ap hako lab! 18 Me anom kava pre, te vell vin kerdo, hoy o čačepen hi. Me djinau, te hi man čačo. 19 Koon hi, kay nay sikrell, te hi i doosh ap mande? Palle kamaus miro mouy te rikrell, oun te merell. 20 Miro Devel, kal douy koova kre mantsa, palle khatrau man ninna gar glan tire yaka: 21 Le tiri phagi mandar krik, kre mange bouder gar daar oun traash! 22 Palle de ap mande gole, oun me dau pale gole. Oder mouk man tout te poučell, oun tou peneh mange pale! 23 Har boud doosh lom me ap mande? Havo čilačepen krom me? Mouk man te djinell, kay me tiro dromestar tele djom, oun krom, hoy tou gar kameh! 24 Hoske khatreh tou tiro mouy glan mande? Hoske rikreh man yekeske, kay kamell touke čilačepen te krell? 25 Hoy hom me? – I patri, hoy o roukestar tele phourdedo vas, oun i kotar phouss, hoy i dourho krik hidjrell. Hoske kreh mange daar oun leh man palla? 26 Tou aneh djoungelo koova ap mande pre oun čineh les an i liil. Ninna koy doosh, hoy anom ap mande, har terno homs, aneh tou ap miro shero pale. 27 Mire herya čival an shelle, oun deh yak ap hako drom mandar, oun leh mire pire an o yak, kay le djan. 28 Yaake perau khetne har phouro kasht, har kol ripya, kolen i kirme paash rhan. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.