Hiob 12 - O Debleskro Lab 2024 (Sinte-Manouche)

O Hiobeskro triinto rakepen

¹ Koy rakras o Hiob oun penas:

² Čačepah, t'mer han kolla, ap kolende hakeno hounte shounals! T'mentsa merell o gosvepen vin!

³ Me ninna hom yaake gosevo har t'mer. An či krenn t'mer mange čomone glan. Hakeno djinell kova, hoy t'mer penan.

⁴ Hoske vom mire malenge sapaske? Me dom gole ap o Debleste, oun yob shounas man. Ninna te hom an o čačepen tardo oun djau o čačo drom, sanenn le man vin.

⁵ Kolla, kay lenge mishto djal, dikenn tele ap koleste, kay an i bibarht hi, oun stakrenn kolen gomme, kolengre herya trissenn.

⁶ I khera kolendar, kay i vavaren zoryah tele rikrenn, hi zoreles tardo. Oun kek krell kolenge daar, kay krenn savo koova te vell o Devel rhoyedo, Yon patsenn, te hi len o Devel an pengro vast.

⁷ Pouč i firhen oun i čirklen, hoy djinenn le pral o Debleste. Oun yon penenn les touke.

⁸ Pouč ninna i tikne firhen ap i phoub, oun i mače an o baro pani, oun yon penenn les touke.

⁹ Koon hi kova, kay djinell gar, te kras o baro Debleskro vast kova lauter?

¹⁰ An leskro vast hi o djipen halauterestar, hoy djivella, ninna o djipaskro dourho i tsele menshendar!

¹¹ Te shounell i mensho, hoy rakedo vell, poučell lo pes gar, hoy čačo oun hoy gar čačo hi? Kova hi yaake har peskro mouy djinell, havo rhapen lačo oun havo rhapen gar mishto hi.

¹² Phoure menshen hi gosvepen. Kolla, kay boud bersha djivan, hayvenn boud.

¹³ O Debles hi gosvepen oun ninna zoor. Yob hayvell halauter, oun nay penell, hoy te vell kerdo.

¹⁴ Kova, hoy yob tele phagas, nay čivell kek pale pre. Kones yob dren pandas, koleske nay krell kek pale pre.

¹⁵ Rikrell yob o brishin pale, vell o tselo them trouk. Moukell lo boud brishin te perell, čakrell boud pani o them, oun krell les paash.

¹⁶ Pash leste hi i zoor oun o čačo gosvepen. Les hi ninna i zoor pral koleste, kay perell o čačo dromestar tele, oun pral koleste, kay anell les o čačo dromestar tele.

¹⁷ Kol pralstoune, hoy i rayenge penenn, hoy te krenn le, kolendar lell lo lengro gosvepen krik, oun krell i čačepangre rayen dinelo.

¹⁸ I pandlen kol bare rayendar anell lo dran o pandepen vin, oun anell i bare rayen an o pandepen.

¹⁹ I rashayenge lell lo lengre rashayengre ripya krik, oun i zorelenge lengri zoor pral i vavarende.

²⁰ Kolla, kay nay rakrenn lačes glan i vavarende, kolenge lell lo i laba krik, oun i phourentsa krell lo, te djinenn le bouder gar hoy čačo hi oun hoy gar čačo hi.

²¹ Bari ladj anell lo ap i an-dikle pralstunende. Oun i zorelendar lell lo lengro kourepaskro koova krik.

²² Yob anell kova glan, hoy khatedo his an o kalo telstunepen, oun krell, te vell o tamlepen diklo.

²³ Yob krell, te venn i natsyone baro, oun ninna, te venn le pale tikno. Oun yob dell i menshen i baro them, oun tradell len pale kote vin.

²⁴ Yob krell, te venn lengre raya dinelo, oun krell, te nashenn le trouyel kote, kay kek drom hi.

²⁵ Har korele rikrenn le pengre vasta vin, te hatsenn le pengro drom an i kali rat, kay kek momeli hi, oun har i mate nashrenn le pen.