Hiob 11 - O Debleskro Lab 2024 (Sinte-Manouche)O Sofar: Leskro ersto rakepen 1 Pal kova rakras o Sofar dran o them Naama oun penas ap o Hiob: 2 Patseh, te nay penah mer či pale ap kava boud rakepen? Sikrenn boud laba, te hi yek an o čačepen? 3 Tiro tselo rakepen nay rikrell men gar pale, te kras mer maro mouy pre. Te rikreh men dineleske, patseh, te čingras gar touha? 4 Tou penal: “Kova hoy me rakrom, hi halauter čačo. Me hom djoudjo glan o Debleskre yaka.” 5 Kamoms, te krals o Devel kanna peskro mouy pre oun rakrals kokres ap toute! 6 Yob djinell halauter pral halauter. Kamoms, te sikrals lo toute peskro gosvepen, hoy menge khatedo hi. Palle hounte hayvess, te dikell o Devel pral boud doosh toutar pral vergel! 7 Patseh, te djineh halauter, hoy an o Debleskro dji hi? Nay hayveh tou, har baro o zorelo Devel hi? 8-9 O Debleskro gosvepen hi doureder har o bolepen hi, oun doureder tele har o moulengro them. Kova hi bareder har i phoub oun bourhleder har o baro pani. Tou nay hayveh oun djineh gar halauter! 10 Te vell yob oun pandell yekes, oun anell les glan i tsillo, te krell lo o čačepen pral leste vin, koon nay rikrals les pale? 11 Yob djinell, koon i či-molde hi, oun dikell o čilačo koova, hoy le krenn. Kova hi gar khatedo glan leste. 12 Nay vell kova gosevo, koles či an o shero hi? Yaake rah gar, har i bourika kek menshes ap i phoub anell! 13 Tou, Hiob, hounte rissress tout tiri tseli zoryah pash o Debleste, oun hadess tire vasta pre leske. 14 Te kral čilačepen, mouk tele kolestar, te vell kek čilačepen an tiro kheer hatslo. 15 Palle nay hidjreh tou tiro shero pre, oun hounte ladjess gar. Palle hal zoreles tardo oun dareh či. 16 Tiri bibarht nay bistreh. Te vell li touke an tiro shero, hi li har pani hoy krik nashas. 17 Oun pral tiro djipen djal o kham pre, oun hi zorelo har mashkral dives. Ninna te hi kanna tamlo, vell i nevo dives. 18 Oun tiro dji lell pale nevi zoor oun djineh, lauter vell mishto. Rati dikeh tout trouyel, oun čiveh tout pale tele kek daryah. 19 Oun tou hal čiddo, oun kek vell pral toute, oun krell tout traash. Oun boud venna, kay mangenn toutar, te kress lenge lačepen. 20 I čilače hayvenn gar, hoske lenge djoungeles djal, oun hatsenn gar vin dran lengri bibarht. Lenge ačell či har te dikenn le ap ko dives, kay merenn le. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.