Hiob 10 - O Debleskro Lab 2024 (Sinte-Manouche)1 Kamau bouder gar te djivell. Doleske rikrau miro ropen ninna gar pale, oun rakrau yaake, har miro doukedo dji mange penell. 2 Me penau ap o Debleste: Ma pen: Doosh hi ap toute! Pen mange, havi doosh tou ap mande hatsal? 3 Hoy aneh kava touke, te rikreh man zoryah tele? Hoske vitsreh man toutar krik, man, koles tire vasta kran, oun moukeh kova mishto te djal, hoy lan pen i čilače glan? 4 Hi tout mensheskre yaka? Dikeh tou yaake har i mensho dikell? 5 Hi tiro djipen yaake tikno har i mensheskro djipen? Djan tire bersha yaake sik trouyel har i menshengre bersha? 6 Hoske rodeh doosh ap mande, oun dikeh palla, havo čilačepen krom? 7 Tou djineh, te hi ap mande kek doosh, oun te hi kek koy, koon nay lell miro djipen dran tiro vast vin. 8 Tou kral man tire vastentsa, lauter ap mande hi toutar kerdo; oun kanna rhah tou man pre! 9 Ma biste, te kral man dran čik. Kameh tou kanna, te vap pale čik? 10 Tou kral, te vas miri day mantsa vavarčandes, oun kral, te vom me i tikno mensho an late. 11 Tou dal man kokale oun muskle, pandal len khetne, oun čakral mass oun hauta pral lende. 12 Tou dal man djipen oun kral lačepen ap mande, oun dal mishto yak ap miro djipen. 13 Ninna te his yaake, djinau, khatedo an tiro dji his tout čomone vavar mantsa glan: 14 Tou kamal yak ap mande te dell, te dikess, te loms me doosh ap mande. Palle kamal miri doosh ap mande te moukell. 15 Te lom doosh ap mande, djal mange djoungelo! Ninna te lom kek doosh ap mande, hounte rikrap miro shero tele. Miri ladjatar oun miri doukatar hom har mato. 16 Te hadau miro shero pre, palle leh tou man palla, har te vals i levo, oun sikreh tiri bari zoor, te doukress man. 17 Tou čiveh menshen pre tardo, kay čomone ap mande pre anenn. Oun tiri rholi ap mande vell gomme bareder. Oun tou bičreh yek phagi pral i vavar ap mande. 18 Hoske moukal man boldo te vell? Hoske moukal tou man gar glan kova te merell? Palle dikals man kek! 19 Mange vals feteder, te voms har kolla, kay van moules boldo, oun paskedo. 20 Kol divessa, hoy man gomme hi, hi bouder gar boud. Mouk mandar tele, dik krik mandar, te nay vap i tikno tsiro gomme barhtelo, 21 glan te djau koy, kay vau bouder gar pale – an o tamlo them, kay hako tsiro kali rat hi 22 ava, an ko them pherdo tamlepen oun kali rat, kay lauter divyes trouyel čiddo hi, oun kay ninna i momeli tamlo hi. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.