Hebrearja 9 - O Debleskro Lab 2024 (Sinte-Manouche)

O Debleskro kheer ap i phoub

¹ An ko phouro tsiro, har o Mose i menshenge penas, har djan le ap o Debleskro drom, koy penas lo lenge ninna, har te boudrenn le o Debleske an leskro kheer, oun ninna, har te krenn le leske i kheer ap i phoub, kay mangenn le les an.

^2-3 Ko Debleskro kheer his i tikno kheer, kerdo dran firhengre balla, hoy hidjran le nay. Koles his douy iseme. I glanstouni isema kharella: O Debleskri isema. I palstouni isema kharella: O Debleskri kouč isema. An i glanstouni isema his i momelengri oun i rhapaskri tardo. Ap i rhapaskri his kol mare čiddo, hoy dan le o Debleste. Mashkral kol douy iseme his i voudar dran kouč pesso than.

⁴ An i palstouni isema his o sonakaskro bob tardo, kay kouč goudlo kasht pral pre rhačedo vas, hoy mishto soungella. Koy his ninna o sonakaskro morhton. An leste his o sonakaskro khoro, kay his ko maro dren čiddo, hoy Manna kharella. An ko morhton his ninna o Aroneskro kasht, hoy zenelo vas, ninna kol douy činle barra. Ap kolende his i deesh Debleskre laba činlo, hoy o Devel peskre menshentsa vin kras.

⁵ Pral pre ap o sonakaskro morhton his douy rayle bolepangre dran sonakay tardo. Kolen his moussya har bare čirklen hi. Pengre moussya rikran le pral o sonakaskro morhton. Kote vell i menshengri doosh krik lino. Kanna kamah gar te rakras pral hako tikno koova an o Debleskro tikno kheer.

⁶ Kanna sikrau t'mende, hoy an o Debleskro tikno kheer kerdo vas. Hako dives djan i rashaya an i glanstouni isema, te krenn le pengri boudi o Debleske.

⁷ Yek kopo an o bersh djas o baro rashay kokres an i palstouni kouč isema. Har djal lo dren, lell lo o rat peha i firhestar, hoy maras lo o Debleske, te lell o Devel leskri doosh lestar, ninna i doosh kol menshendar, kay anan doosh ap pende, ninna te djinan le gar, kay kova, hoy yon kran, i čilačo koova his.

⁸ Yaake sikrell men o Debleskro Dourho, kay kek nay djal an koy palstouni kouč isema, yaake rah, har hi koy glanstouni isema koy.

⁹ I glanstouni isema sikrell mende ko tsiro, an hoy mer kanna djivah. I menshe anenn firhen, oun vavar koova o Debleske. Kova lauter nay krell lengro dji gar djoudjo. An lengro dji hayvenn le, te hi le gomme čilačo.

¹⁰ Ninna rikrenn pen i menshe ap laba, kay penenna, hoy te rhan le gar, oun hoy te piyenn le gar, oun har te thovenn le pen. Kol laba hi menshengre laba. Kova lauter his mishto yaake rah, har sikras len o Devel gomme gar o feteder drom, te nay venn yon pash leste.

¹¹ Kanna vas o Yezous Kristo. Yob hi maro baro rashay oun anas men o bolepaskro bravlepen. O Debleskro kheer an o bolepen, kay yob dren djas, hi bareder oun feteder har ko Debleskro kheer ap i phoub. O Debleskro kheer an o bolepen hi gar i menshendar kerdo.

O Debleskro kheer an o bolepen

¹² Har o Yezous an o Debleskro kheer an o bolepen djas, anas lo gar i bakrengro rat peha, vitar gar i groumyengro rat. Na-a. Peskro rat anas lo glan o Debleste. Kova kras lo yek kopo oun gar boud kope. Oun yaake las lo mari doosh hako tsireske mendar.

¹³ An o phouro tsiro čoras o rashay o bakrengro rat, oun o groumyengro rat, oun o yagakri čik i rhačedi groumyatar ap kolende, kay hi pale-čiddo glan o Debleste, te venn le pale erligo kerdo. Te hi o firheskro rat yaake zorelo,

¹⁴ kitse zorleder hi o Yezous Kristeskro rat. O Debleskro Dourho, kay djivella hako tsiro, das o Yezous Kristeste i zoor, te nay das lo peskro djipen an o merepen. Oun yob meras o Debleske yaake har i bakro, ap koleste kek doosh hi. Kova kras lo, te lell lo mari doosh mendar, yaake te djivas mer bouder gar pal kol laba, hoy či moldo hi oun i menshe an o merepen anenna. Kanna hi maro dji djoudjo, oun mer nay vah čačepah o djido Debleske koy.

¹⁵ Har o Yezous Kristo meras, las lo i doosh kol menshendar krik, kay djan ap o phouro drom, oun kras lenge i nevo drom, kay nay venn le pash o Debleste, te djivenn lauter kolla, kay o Devel peske gole das, leha khetne hako tsiro, oun te lenn le ko shoukar bravlepen pash leste an o bolepen, yaake har yob penas.

^16-17 Te hi yekes i shoukar bravlepen, hoy kamell lo i vavares te dell pal peskro merepen, palle činell lo kova an i liil. Pal leskro merepen lell ko vavar ko bravlepen, yaake har an ko liil tardo hi. Yob nay lell kova gar yaake rah, har ko vavar gomme djivella. Na-a, kova hounte meras.

¹⁸ Yaake van ninna an o phouro tsiro firhe maredo, har das o Devel i menshen i tsillo, kay penas lo lenge, har yon leha khetne nay venna. Oun i firhengro rat sikras, te rikrenn le pen ap kol Debleskre laba.

¹⁹ Kova lauter djas yaake: O Mose penas i menshenge kol laba, hoy an ko liil tardo hi, kay činlo hi, har te djivenn le. Palle las lo i groumyengro rat oun i bakrengro rat, das pani pashel, oun las i kasht, hoy kharella Hysop, pandas lole bakrengre balla pral pre, oun čivas ko kasht i ballentsa an o rat, oun čoras ko rat ap ko liil oun ap kol menshende,

²⁰ oun penas ap lende: Ko rat sikrell t'mende: T'mer han o Debleskre menshe, oun djivenn pal kol laba, hoy yob t'menge penas.

²¹ Oun ap o Debleskro tikno kheer čoras lo ninna o rat, ninna ap i tsele čare oun khore, kay kote dren hi.

²² Hi gar boud koova, hoy vell gar o rateha djoudjo oun erligo kerdo. Yaake hi an o Moseskre lila činlo. Oun te vell kek rat vin čoredo, nay vell kek doosh krik lino.

²³ O Debleskro tikno kheer ap i phoub oun lauter, hoy kote dren hi, sikrell mende i tikno kotar ko Debleskro kherestar, hoy hi an o bolepen. O Debleskro tikno kheer ap i phoub hounte vas i firhengro rateha djoudjo oun erligo kerdo. An o Debleskro kheer an o bolepen djas yek, koleskro rat hi lačeder har i firhengro rat.

²⁴ Kova hi o Yezous Kristo. Yob djas gar an o Debleskro kheer, hoy i menshe kran, oun hoy sikrell mende kokres i tikno kotar ko čačo Debleskro kherestar an o bolepen. Na-a, yob djas an o bolepen glan o Debleste, te mangell lo les menge.

²⁵ O menshengro baro rashay djal hako bersh o firhengro rateha an o Debleskro kouč isema. O Yezous Kristo meras yek kopo, oun anas peskro rat yek kopo glan o Debleste, oun gar boud kope.

²⁶ Te vals kova gar yaake, hounte merals lo boud kope yaake rah, har i phoub koy hi. Yob vas kanna an kava tsiro, kay mer djivah, te merell lo, oun te lell lo yek kopo hako tsireske i doosh i menshendar.

²⁷ Oun yaake har i tsele menshe hounte merenna yek kopo, oun palle rakrell o Devel o čačepen pral lende vin,

²⁸ yaake hounte meras o Yezous Kristo yek kopo i menshenge, te lell lo i doosh boud lendar ap peste. Ap ko tsiro, kay vell lo i douyto kopo, vell lo gar, te lell lo i doosh i menshendar krik. Na-a. Palle vell lo kolenge, kay čivan pengro dji ap leste, te lell lo len pash peste, oun te dell lo len lauter kova, hoy hi lenge an o bolepen.