Hebrearja 7 - O Debleskro Lab 2024 (Sinte-Manouche)

O rashay Melkisedek

¹ O Melkisedek his o baro ray pral o foro Salem, ninna o baro rashay o baro Deblestar. An ko tsiro djas o Abraham an o kourepen, oun maras i bare rayen pengre lourdentsa. Har yob pale vas, djas o Melkisedek pash leste, oun rakras o Debleskri barht pral leste vin.

² Oun o Abraham das les o deshto kotar lauterestar, hoy las yob an o kourepen. Ko lab Melkisedek kharella Čačo Ray. Oun yob his ninna o ray pral o foro Salem. O lab Salem kharella Barht.

³ An o Debleskro lab hi či činlo pral leskro dadeste oun leskri date. Či hi koy činlo pral leskre phourende, vitar gar pral ko dives, kay yob boldo vas, oun kay yob meras. Yaake ačell lo o baro rashay hako tsireske, har o Debleskro čavo.

⁴ Kova sikrell t'men, har baro o Melkisedek his! Koles das maro kamlo dad, o Abraham, o deshto kotar lauterestar, hoy las yob an o kourepen.

⁵ Ninna an o them Israel lan i rashaya o deshto kotar lauterestar, hoy i Israelitarya penge khetne anan. Yaake his činlo an o Moseskre lila. Kol rashaya, – lengro dad his o Levi, – lan o deshto kotar kolendar, kay lengre phrala his. Kolla lauter van pal o Abraham.

⁶ Koleste das o Devel peskro lab, te krell lo les baro, oun te dell lo les boud barht. Ninna te hi o Abraham yaake baro, hi o Melkisedek bareder har yob. Yob las o deshto kotar o Abrahamestar oun rakras o Debleskri barht pral leste vin, ninna te his lo gar leskre menshendar.

⁷ Oun hakeno djinella: O bareder rakrell i barht vin pral o tikneder.

⁸ I rashaya an o them Israel, kolende i menshe pengro deshto kotar denna, kolla hi menshe, kay hounte merenna. O Melkisedek, kolestar hi penlo, te djivell lo.

⁹ I rashaya an o them Israel venna pal o Levi. Kolla lenn o deshto kotar, hoy pengre phrala khetne anan. Oun o Levi vas pal o Abraham. Yaake nay penah: Har das o Abraham o deshto kotar, das kova ninna leskro čaveskro čavo, o Levi,

¹⁰ ninna te his o Levi gomme gar boldo, har o Melkisedek pash o Abrahameste djas.

¹¹ Mer djinah, har das o Devel peskre menshende o Moseskre lila, koy penas yob ap o Leviteskre čave, te venn le rashaya. Ninna te kran yon pengri boudi yaake, har lengro dad, o rashay Aron, nay čivan le i menshen gar an o čačepen glan o Debleste. Doleske rodas o Devel i vavar rashayes vin, yek, kay krell peskri boudi yaake har o Melkisedek, oun bouder gar yaake har o Aron.

¹² Mer djinah: Te lell o Devel peske i vavar rashay, kay gar o Leviteskre čavendar hi, palle sikrell o Devel ninna i vavar drom, kay venn nay i menshe pash leste.

O baro rashay Yezous Kristo

^13-14 Maro baro rashay, kolestar kate rakedo vella hi o Yezous Kristo. Yob vell gar o Leviteskre menshendar. Mer lauter djinah, leskre menshe venna pal o Youda. Oun kek kolendar his i rashay. Lenge penas o Mose gar, te venn le rashaya.

^15-16 Mer hayvah mishto, ko vavar rashay, kay hi yaake har o Melkisedek, koles hi kek dad, koon ninna rashay his. Na-a. Les hi o Debleskro djipen, kay hako tsiro ačella. Doleske vas lo maro rashay.

¹⁷ O Devel penell pral leste: Tou hal i rashay hako tsireske har o Melkisedek.

¹⁸ Yaake čivas lo kol phoure laba, hoy o Mose i menshenge penas, ap i rig. An kol laba his kek zoor. Oun yon his či moldo.

¹⁹ O Moseskre laba nay kran i menshen gar čačo glan o Debleste. Doleske sikras men o Devel i nevo oun feteder drom, kay anell men pash leste.

^20-21 Yob čivas o Yezouses an leskri boudi oun penas: Tou hal i baro rashay hako tsireske, oun yob das peskro vast koy pre. Oun kal laba nay khaytenn les kek tsireske. Har yob o Leviteskre čaven lengri boudi das, te venn le rashaya, das yob gar peskri vast koy pre.

²² Yaake vas o Yezous kova, kay nay anell men čačepah pash o Debleste. Kova nay kras o Mose gar.

²³ An ko tselo tsiro his boud rashaya. Kolla lauter hounte meran. Har yek meras, vas pale i vavar.

²⁴ O Yezous ačell o rashay hako tsireske. Yob merella gar, oun kek vavar vell pal leste.

²⁵ Doleske nay krell lo, te djal kek kolendar nashedo, koon yob pash o Debleste anas. Yob djivell hako tsireske, oun mangell o Debles lenge.

²⁶ O Yezous hi o baro rashay, kay hounte vell men. Yob hi lačo glan o Debleskre yaka. Kek čilačepen, vitar kek doosh hi ap leste. Na-a, yob hi gar yaake har mer čilače menshe ham, kay ham pale-čiddo glan o Debleste. Oun o Devel kras les bareder har hako vavar an o bolepen.

²⁷ Yob hi gar har kol vavar bare rashaya, oun hounte anell gar hako dives i maredo firhes o Debleske, te vell peskri doosh krik lino. Ninna hounte anell lo gar i vavar menshenge marede firhen o Debleske, te vell lengri doosh krik lino. Na-a, yob kokres das peskro djipen an o merepen yek kopo hako tsireske.

²⁸ Kol vavar bare rashaya hi menshe oun gar zorelo, oun nay krenn gar mishto kova, hoy o Devel lendar kamella. Yon van rashaya yaake, har o Mose an peskre lila činas. Boud tsiro palla, das o Devel peskro lab, oun das peskro vast koy pre, te vell leskro čavo i baro rashay hako tsireske. Yob krell lauter mishto, hoy o Devel lestar kamella.