Hebrearja 6 - O Debleskro Lab 2024 (Sinte-Manouche)

Djan doureder ap o Debleskro drom!

¹ Kanna kamah te rakras pral kova, hoy kolenge hi, kay hi phoure an o patsepen, oun bouder gar pral kova, hoy mer kolenge penah, kay hi terno an o patsepen. Mer kamah bouder gar pral kova te rakrell, hoy t'mer shounan, har patslo van! Ap ko tsiro vas t'menge penlo, te moukenn t'maro čilačo drom, hoy an o merepen anella, oun te patsenn ap o Debleste, oun te djan ap leskro drom.

² Ninna vas t'menge penlo, te moukenn t'men te taufrell, oun hoske i patslo peskre vasta ap i vavareste čivella. T'menge vas ninna penlo, te krell o Devel i moulen djido, oun te rakrell lo o čačepen pral lende vin. Kova, hoy yob len dell, – o djipen har i phagi, – kova ačell hako tsiro ap lende.

³ Djas kanna doureder! Kova kamell o Devel mendar!

^4-6 Hi menshe koy, kolenge kras o Devel lengre djia pre, te hayvan le leskro bolepaskro lačepen. Oun o Debleskro Dourho boudras an lengre djia. Oun yon hayvan o Debleskro lačo lab oun leskri zoor an lengro djipen. Kolla te perenn o Debleskro dromestar tele, nay anell len kek pale ap o Debleskro drom. Kova, hoy yon krenna hi yaake, har te denn le penge o Yezous Kristes pale ap o troushel. Oun kol vavar san pral leste.

⁷ Mer menshe ham har i phoub, ap late boud kope o brishin das. O Devel dikell lačes ap koleste, kay hi har koy phoub, hoy lell o brishin an peste dren, oun anell lačo koova vin kolenge, kay boudrenn koy.

⁸ Yob dikell gar lačes ap koleste, te hi lo har koy vavar phoub, hoy anell soubyengre bourra, oun vavar djoungele bourra vin. Koy phoub hi či moldo, oun pal i tsiro vell li rhačedo.

⁹ Kamle mala, ninna te rakrah yaake, patsah zoreles, te han t'mer ap i feteder drom. Ko drom anell t'men pash o Debleste.

¹⁰ O Devel hi lačo oun čačo, oun bistrell gar t'maro kamlepen ap leste, har boudran i patslenge, oun krenn kova gomme kanna doureder.

¹¹ Mer kamah o djiyestar, te čivell hakeno t'mendar peskro dji ap ko shoukar djipen, hoy kamell o Devel les te dell an o bolepen.

¹² Ma avenn khino, te krenn o Debleskri boudi! Avenn yaake har kolla, kay ačan zoreles an o patsepen, oun lan kova, hoy o Devel lenge penas.

O Devel krella, hoy yob penas

^13-16 Te dell i mensho peskro lab, dell lo peskro dadeskro vast koy pre. Leskro dad hi bareder har yob. Yaake sikrell lo o vavares, te krell lo čačepah kova, hoy yob penas. Oun ko vavar patsell les. Har das o Devel o Abrahameste peskro lab, das lo peskro vast koy pre. His kek, kay his bareder har o Devel. Oun o Devel penas: Čačepah, boud barht moukau pral toute te vell, oun toutar venna boud boud čave. Oun o Abraham patsas o Debles, oun vitsras gar peskro patsepen ap i rig. Oun yaake las lo kova, hoy o Devel leske penas.

¹⁷ Har das o Devel peskre menshen peskro lab, das lo ninna peskro vast koy pre. Yaake sikras lo len, te dell lo len čačepah kova, hoy yob lenge penas.

¹⁸ Ko lab, hoy das o Devel oun das peskro vast pre, nay vell an kek tsiro krik lino. O Devel rhorhella gar. Oun mer, kay vam pash leste, te lell lo men dran o čilačepen vin, men hi kanna leskro zorelo lab, te dell lo men o djipen, hoy gar pre-herella, yaake har yob penas.

^19-20 Kava patsepen rikrell maro djipen, yaake har rikrell i zorelo saster i shiffo, te djal lo gar ap o pani nashedo. Oun kova, ap koleste patsah oun dikah, kova hi o Yezous. Yob djas glan mende pash o Debleste an o bolepen, yaake har djas o baro rashay an o phouro tsiro an o Debleskro kheer. Oun yaake vas o Yezous hako tsireske savo baro rashay, har glan i rah tsiro o Melkisedek his.