Hebrearja 3 - O Debleskro Lab 2024 (Sinte-Manouche)

O Yezous hi bareder har o Mose

¹ Mire patsle phrala, o Devel das t'men gole, te djivenn pash leste an o bolepen. Doleske dikenn ap o Yezouseste, kones o Devel bičras, te anell lo i menshen ap leskro drom. Les hi peskro dadeskro vast. Oun yob hi maro baro rashay. Ap leste patsah mer. Yob mangell o Debles menge.

² Koy boudi das les o Devel. Oun yob kras lat mishto yaake, har ninna o Mose peskri boudi o Debleskre menshenge mishto kras.

³ O Yezous hi bareder har o Mose. Kova hi yaake, har te vals i kheer kerdo: Kova, kay kras ko kheer, vell boudeder sharedo har ko kheer, hoy kerdo vas.

⁴ Hako kheer vell yekestar kerdo. Oun kova, kay lauter kras, hi o Devel.

⁵ O Mose boudras mishto o Debleskre menshenge. Kova, hoy yob kras oun penas, sikras lende, hoy o Devel kamas te krell an ko tsiro, hoy vella. Ninna te boudras o Mose mishto, his lo i Debleskro boudepaskro.

⁶ O Yezous Kristo hi o Debleskro čavo. Oun an leskre vasta hi o Debleskre menshe, ap kolende yob mishto garda della. Kolla ham mer, te čivah maro tselo patsepen ap leste, oun dah gar pre bis te lah o raylo djipen pash leste.

Ačenn ap o Debleskro drom!

⁷ Doleske shounenn, hoy o Debleskro Dourho t'menge penella: T'mer te shounenna kava dives o Debleskro rakepen, palle shounenn ap leste!

⁸ Krenn t'maro dji gar har barra yaake, har t'mare phoure kran an o moulo them, har čingran le ap o Moseste, oun kaman miro drom bouder gar te djal!

⁹ Ninna te dikan le star-deesh bersha, hoy me, o Devel, lenge krom, patsan le man gar, oun mire laba his lenge či moldo.

¹⁰ Doleske vom me rhoyedo ap lende, oun penom: Hako tsiro djan le pal pengro shero. Miro drom kaman le gar te djal.

¹¹ Yaake rhoyedo homs ap lende, te dom man sovel, oun penom: Yon venn gar dren an miro them, kay yon pash mande khere nay vans.

¹² Mire phrala, denn yak ap t'mare djia, te moukell kek t'mendar peskro patsepen, oun kamell o djido Deblestar bouder či te djinell.

¹³ Rakrenn hako dives khetne pral o patsepen, te ačenn pash o Debleste! Ko tsiro, kay rakrell o Devel ap t'mende hi kanna. Te shounenn t'mer gar ap o Debleste, nay vell i tsiro, kay shounenn t'mer bouder gar, te dell lo t'men gole.

¹⁴ Te rikrah zoreles ap maro patsepen ap o Yezous Kristeste yaake rah, har djivah, palle ham čačepah leskre.

¹⁵ Doleske hi činlo an o Debleskro lab: Kava dives, te shounenn t'mer o Debleskro rakepen, shounenn ap leste, oun krenn t'mare djia gar har barra, har t'mare phoure kran, har čingran le ap o Moseste, oun kaman miro drom bouder gar te djal!

¹⁶ Penenn mange: Koon his kolla, kay shounan o Debleskro rakepen, oun kaman bouder gar ap leskro drom te djal? Kolla his lauter, kay djan o Moseha vin dran o them Egiptia.

¹⁷ Pale poučau t'mendar: Pral koneste vas o Debleskri rholi star-deesh bersha? Leskri rholi vas ap kolende, kay kaman bouder gar ap leskro drom te djal. Kolla meran an o moulo them, oun ačan kote čiddo.

¹⁸ Kanna penenn mange: Pral koneste rakras o Devel, har yob pes sovel das, te venn le gar an leskro them, kay yon hako tsiro khere vans? Yob rakras kolendar, kay shounan gar ap leste.

¹⁹ Yaake dikah mer: Kolla, kay patsan gar, hoy o Devel penas, hi kolla, kay van gar an o Debleskro them dren.