Hebrearja 2 - O Debleskro Lab 2024 (Sinte-Manouche)

O Debleskro nevo drom

^1-2 Glan i rah tsiro penan i bolepangre mare phourenge, har hounte djan yon ap o Debleskro drom. Koon gar ap o Debleste shounas, oun gar ap leskro drom djas, kova las peskri phagi. Yaake zorelo hi o Debleskro lab. Doleske hounte das mer baro yak ap ko lab, hoy mer shounam, te djivas pal kova, oun te peras gar ko čačo dromestar tele.

³ Mer te djah gar ap o nevo drom, kay lah o djipen, hoy gar pre-herella, palle vella o Debleskri rholi pral mende. Kava nevo drom sikras men maro ray Yezous. Oun leskre laba hi o čačepen. Kolla, kay les shounan, penan les menge.

⁴ Oun o Devel das len peskri zoor, te krenn le baro oun zorelo koova, hoy kek vavar mensho nay krella. Yaake sikras lo, te penan le o čačepen. Ninna das lo i patslende peskro Dourho oun peskri zoor, te krenn le peskri boudi mashkral i menshende. Hakeneste das lo i zoor, te krell yob koy boudi, hoy o Devel lestar kamas.

O Debleskro čavo anell men ap o nevo drom

⁵ Ap i bolepangre penas lo gar, te venn le raya pral koy nevi phoub, hoy vella, kolatar mer kate rakrah. Na-a.

⁶ Kova penas lo ap i menshende. An o Debleskro lab hi činlo: Hoske bistral tou gar o menshes? Hoske deh tou ap leste garda?

⁷ I tikno tsiro moukal les tikneder te vell har i bolepangre. Palle kral tou les raylo oun baro.

⁸ Tou dal lauter an leskre vasta. Či hi koy, pral koleste yob gar o ray hi. Ninna te djinah mer kova, dikah kanna gomme gar lauter an leskre vasta.

Hoy o Yezous i menshenge kras

⁹ Kones mer dikah, kova hi o Yezous. Yob his i tikno tsiro tikneder har i bolepangre, oun meras i menshenge. Doleske kras o Devel les baro oun raylo. Yaake lačo his o Devel i menshenge, te bičras lo o Yezouses lauterenge an o merepen.

¹⁰ O Devel kamas, te venn boud menshe peskre čave, oun lenn leskro raylepen. Doleske hounte las peskro čavo douka oun merepen ap peste, te nay anell lo len ap ko drom, kay lenn le o Debleskro djipen. Yaake his kova mishto glan o Debleskre yaka, kay lauter kras, oun koleske lauter kerdo vas.

¹¹ O Yezous kras i patslen čačo oun erligo, oun anas len pash peskro dadeste. Kanna hi leskro dad ninna lengro dad. Doleske ladjell lo gar, te dell lo len “phrala” gole.

¹² Oun yob penell ap o Debleste: Me sikrau mire phralende, koon tou hal. Oun kote, kay yon khetne venna, sharau tout oun givau gilya touke.

¹³ Oun pale penell lo: Me čivau man an o Debleskre vasta. Oun pale penell lo: Dik, kate hom me kal čaventsa, kay o Devel das man.

¹⁴ Yon hi menshe dran rat oun mass. Doleske vas lo ninna i mensho har yon, oun meras, te las lo o bengeske i zoor krik pral o merepen.

¹⁵ Yaake nay las lo kol menshenge i daar o merepastar, hoy his len an pengro tselo djipen.

¹⁶ Čačepah, kova kras lo gar i bolepangrenge, na-a, kova kras lo kol menshenge, kay ap leste patsenna, yaake har o Abraham ap leste patsas.

¹⁷ Doleske hounte vas o Yezous an lauter yaake, har leskre phrala, te vell les i baro dji lenge, oun te vell lo lenge i čačo baro rashay glan o Debleste, te mangell lo leskre menshenge, te lell yob i doosh lendar krik.

¹⁸ O Yezous hayvella, hoy douka hi. Oun yob djinella, har kova hi, te kamell o beng yekes o Debleskro dromestar tele te anell. Doleske nay vell lo kanna ninna ap i rig kolendar, kay kamell len o beng o Debleskro dromestar tele te anell.