Hebrearja 11 - O Debleskro Lab 2024 (Sinte-Manouche)

O bare patsepen kol patslendar an o phouro tsiro

¹ Te patsah ap o Debleste, patsah mer ninna, te dell men o Devel kova, hoy yob penas. Kova patsah zoreles. Ninna te dikah kova gomme gar, hi maro dji zorelo oun djinell, te vell kova yaake, har yob penas.

² Savo patsepen his an mare phourende, oun o Devel dikas lačes ap lende.

³ Dran maro patsepen hayvah, te vas o bolepen oun i phoub kerdo dran o Debleskro rakepen. Lauter, hoy kanna dikah, kova kras o Devel dran kova, hoy nay dikah gar.

⁴ An o phouro tsiro patsas o Abel ap o Debleste, oun maras leske i firho. Har dikas o Devel, hoy o Abel leske anas, dikas lo lačes ap kova. Yaake vas o Abel an o čačepen tardo glan leste. Kova, hoy leskro phraal, o Kayn, o Debleske anas, kova his gar yaake lačo glan o Debleskre yaka har kova, hoy o Abel leske anas. Ninna te meras o Abel, sikrell men leskro djipen gomme kava dives leskro patsepen.

⁵ Ninna o Henok patsas, hoy o Devel penas. Oun o Devel las les djides pash peste. Yob hounte meras gar. Kek nay hatsas les bouder. Glan kova vas lestar penlo, te kras lo kova, hoy his lačo glan o Debleskre yaka.

⁶ Te hi yekes kek patsepen, nay krell lo gar, hoy hi lačo glan o Debleskre yaka. Koon kamell pash o Debleste te vell, kova hounte patsell, te hi o Devel djido, oun te hi lo lačo ap koleste, koon rodell les.

⁷ Ninna o Noah patsas, hoy o Devel penas, har yob leha rakras, oun leste sikras, hoy pral i tsele menshende vella. Ninna te dikas o Noah kova gomme gar, shounas lo ap o Debleste, oun kras i baro panyeskro kheer. Yaake hounte meras yob peskre menshentsa gar. Har o Noah ko panyeskro kheer kras, vas diklo, te patsas yob, hoy o Devel penas. Ninna vas diklo, i vavar menshe patsan gar, hoy o Devel penas. Doleske hounte meran le. Ap o Noah penas o Devel: Tou patsal man. Tou hal kanna an o čačepen tardo glan mande.

⁸ Ninna o Abraham patsas, hoy o Devel penas. Har yob leske penas: Dja an ko them, hoy me dau toute oun tire čavende, koy shounas o Abraham ap leste, oun djas dran peskro them vin, oun djinas gar, kay yob djala.

⁹ Ap ko tsiro djivan vavar menshe an ko them, hoy kamas les o Devel te dell. Oun o Abraham djas kate oun kote an ko them trouyel, oun djivas an plarhtene khera. Ninna leskro čavo, o Isaak, oun koleskro čavo, o Yakob, djivan yaake. Kolenge penas o Devel ninna: T'mende dau ko them.

¹⁰ O Abraham dikas ap ko tsiro, kay nay djivell lo an ko foro, hoy o Devel krella, oun hoy hako tsiro ačella.

¹¹ Ninna o Abrahameskri romni, i Sara, patsas, te nay kras o Devel kova, hoy yob lenge penas. An lakro tselo djipen nay las li kek ternepen. Oun kanna, kay his li phouri, penas o Devel, te lell li i čaves. Yoy patsas les, oun las i zoor, te lell li i čaves.

¹² Har o čavo boldo vas, his o Abraham ninna yaake phouro, te nay vals lo bouder gar o dad i čavestar. Oun yob vas o dad boud boud menshendar. Leskre čave, čavengre čave oun lauter, kay pal leste van, van yaake boud har i bolepangre momlia, oun har i tikne barra pash o baro pani, kay kek djinell, har boud kolla hi.

¹³ Kol phoure patsle meran lauter. Ninna te lan le kova gar, hoy kamas o Devel len te dell, patsan le, te lenn le les. Yon dikan kova dour glan pende, oun his barhtelo pral kova. Yon penan pendar, te hi len kek them ap i phoub, oun te hi le kate gar khere.

¹⁴ Kolla, kay yaake rakrenna, rodenn i vavar them, hoy lengro hi, oun kay yon khere hi.

¹⁵ Te rakrans le pral ko them, hoy yon moukan, palle nay djans le kote pale.

¹⁶ Kova kran le gar. Na-a. Lengro dji das gole pal i lačeder them. Kova hi an o bolepen. Doleske ladjell o Devel lenge gar, te penenn le: “Maro Devel!” ap leste. Oun yob kras lenge i foro.

^17-18 T'mer djinenna: An o phouro tsiro kamas o Devel te dikell, har baro o Abrahameskro patsepen hi. Oun o Devel penas ap leste, te marell yob peskro čaves har i bakro, hoy o Debleske maredo vella. Oun o Abraham shounas ap o Debleste, oun las peskro čaves, kay leske kokres boldo vas, te marell lo les glan o Debleste. Glan kava tsiro penas o Devel ap o Abrahameste: Tiro čavo, o Isaak, hi o dad kolendar, kay pal toute venna.

¹⁹ Kolla laba van o Abrahameske an o shero oun yob penas peske: O Devel nay krell les i moulendar djido. Yaake baro his leskro patsepen ap o Debleste. Doleske das les o Devel o čaves pale, oun yob hounte maras les gar. Kova his leske yaake, har te vals lo i moulendar djido.

²⁰ Ninna o Isaak patsas, te vell kova čačo, hoy o Devel penas. Oun o Isaak čivas peskre vasta ap peskre čavende, ap o Yakob oun ap o Esau, oun rakras i barht pral lende vin, hoy o Devel len della an ko tsiro, hoy vella.

²¹ Ninna o Yakob patsas, te vell kova čačo, hoy o Devel leske penas. Har yob ap o merepen čiddo his, čivas lo peskre vasta ap o Yosefeskre čavende, oun rakras o Debleskri barht pral lende vin, oun čivas peskro shero glan tele ap peskro kasht, oun sharas o Debles.

²² Ninna o Yosef patsas, te vell kova čačo, hoy o Devel penas. Har yob ap o merepen čiddo his, penas lo peskre phralenge, te vell ko tsiro, kay djan i Israelitarya dran o them Egiptia vin. Palle hounte lenn le leskre kokale lentsa.

²³ Ninna o Moseskro dad oun peskri day patsan ap o Debleste. Doleske trashan le gar o baro rayestar pral o them Egiptia, har kova penas, te venn i tikne čave maredo, hoy i Israelengre djouvya lan. Har o Moseskro dad oun peskri day dikan, har shoukar lengro čavo hi, khatran le les triin čon.

^24-25 Ninna o Mose patsas ap o Debleste. Har yob baro vas pash o baro rayeste pral o them Egiptia, kamas lo bouder gar, te kharenn le les: O baro rayeskri čakro čavo. Feteder kamas lo douka ap peste te lell, khetne i vavar Debleskre menshentsa, har te djivell lo i tikno tsiro i shoukar djipen an o rayeskro kheer, kay djivan le yaake, har o Devel gar kamas.

²⁶ O Mose kamas feteder, te lell lo ko praasepen ap peste, hoy ninna o Yezous Kristo ap peste las, har te lell lo o tselo bravlepen an o them Egiptia. Leske his o bravlepen an o bolepen boudeder moldo.

²⁷ Dran peskro patsepen djas o Mose vin dran o them Egiptia, oun daras gar o baro rayestar pral o them Egiptia, te vell yob rhoyedo ap leste. Na-a. Yob rikras yaake ap o Debleste, koles kek nay dikella, har te dikals les lo peskre yakentsa.

²⁸ O Devel penas leske, havi bibarht pral o them Egiptia vella. Oun yob penas leske ninna, hoy i Israelitarya hounte krenn, te vell koy bibarht gar pral lende. Koy patsas o Mose, te vell kova čačo, hoy o Devel penas. Oun o Mose penas ap i Israelitarya, te marenn le bakren, oun te rhan le len – kava rhapen vas kharedo Passa – oun te makenn le i firhengro rat ap pengre voudya. Har palle o bolepaskro vas, te marell lo i tsele phoureder čaven, koy ačan i Israeleskre čave djido. Yon his an i khera, kay o rat ap i voudya hi.

²⁹ I tsiro koy pre djan le mashkral o baro pani, hoy kharella Lolo Pani, har te djans le ap o drom. Kova nay kran le doleske, kay patsan le, hoy o Devel lenge penas. I Egiptarya kaman ninna mashkral o baro pani te djal, oun yon tassan.

³⁰ I Israelitarya patsan ninna kova, hoy o Devel lenge penas, har his le glan o foro Yericho tardo. Oun yon djan efta kope troul o foro. Palle peran i tsele barra khetne, hoy troul o foro pre-čiddo his.

³¹ Ninna i loubni Rahab patsas ap o Debleste, oun las kol morshen an lakro kheer dren, kolen o Mose bičras, te dikenn le, har zorelo o foro Yericho hi. Yaake vas i Rahab gar maredo khetne kol vavar menshentsa an ko foro, kay prindjran o Debles gar.

³² Hoy te penap t'menge boudeder? Yaake boud tsiro hi man gar, te rakrap kol morshendar Gideon, Barak, Simson, Yefta, David, Samuel oun kolendar, kay his o Debleskre rakepangre.

O patsepen an o pharo tsiro

³³ Kol tsele morsha patsan, hoy o Devel lenge penas. Mashkral lende his ninna kolla, hoy kouran pen kol bare rayentsa oun kol rayengre lourdentsa. Oun yon his zorleder har kol bare raya oun lengre lourde. Vavar kran o čačepen oun dikan pengre yakentsa, har kova čačo vas, hoy o Devel lenge penas. Vavar van glan bare oun divye margodje vitsedo, oun kolla dandran len gar.

³⁴ Vavar van an i yag vitsedo, oun i yag nay rhačan len gar. Vavaren kaman i menshe i rhareha te marell, oun yon nay nashan penge. Kolla, kay kek zoor bouder an lende his, kolen kras o Devel zoreles. An o kourepen lan le i zoor, te tradan le i vavar lourden krik.

³⁵ Mashkral kolende, kay patsan, hoy o Devel lenge penas, his ninna djouvya, kolengre čave meran. Kolen das o Devel lengre čaven djides pale. Vavar patsle van phares dino an o stilepen. Lenge vas penlo, te moukans le pengro patsepen, nay vans le dran o stilepen vin. Oun yon moukan gar pengro patsepen, oun moukan pen te marell. Pengro tselo djiyeha dikan le ap ko tsiro, kay krell o Devel len i moulendar djido. Kova his lenge boudeder moldo, har o djipen ap kay phoub.

³⁶ Vavar van praasedo, oun van i čoupniyah dino. Vavar van i sasterne shellentsa pandlo, oun an o stilepen vitsedo.

³⁷ Vavar van i barrentsa moulo vitsedo, an kotya činlo, oun o rhareha maredo. Vavar van palla lino. Len his kek kheer oun či te rhal. Lengre koola his dran bakrengre balla oun bouzyengre balla. Oun te van le tapedo, van le dino.

³⁸ Yon nashan an o moulo them trouyel, ninna an i berge oun djinan gar, kay te djan le. Mashkral i bare barra khatran le pen, ninna tel i phoub. Kolla lauter his lače menshe. I vavar menshe ap kay phoub his gar moldo, te djivan kol lače menshe mashkral lende.

³⁹ Kolla lauter patsan ap o Debleste, oun yob dikas lačes ap lende. Fothe lačes yob ap lende dikas, las gomme kek lendar kova, hoy o Devel kamell peskre čavende te dell.

⁴⁰ O Debles his an peskro dji i feteder drom menge. Yob kamas gar, te venn kol phoure patsle glan maro tsiro pash leste. Yob kamell, te vas mer lauter khetne pash leste an o bolepen.