Hebrearja 10 - O Debleskro Lab 2024 (Sinte-Manouche)

I firhengro rat nay las gar i doosh i menshendar krik

¹ Kova, hoy an o Moseskre lila činlo hi, sikrell men gar o tselo bolepaskro bravlepen, hoy kamell o Devel i menshende te dell. Na-a, i tikno kotar kolestar. Kolla, kay anenn marede firhen glan o Debleste, venn gar doleske čačo oun erligo glan leskre yaka. Te vans le čačo oun erligo, hounte anans le gar hako bersh pale firhen glan leste.

² Te krals kol firhengro rat len yek kopo hako tsireske čačo oun erligo, palle hounte anans le bouder gar pale te pale marede firhen glan o Debleste. Lengre djia vans djoudjo, oun yon nay bistrans ko čilačepen, hoy yon kran.

³ Čačepah, kol tsele marede firhen, hoy yon o Debleske hako bersh anan, kova anas lenge pale te pale lengri doosh an o shero.

⁴ Della kek drom, kay lell nay o groumyengro rat oun o bakrengro rat i doosh i menshendar krik.

⁵ Doleske penas o Yezous Kristo, har yob ap i phoub vas, ap o Debleste: Mo Devel, marede firhen oun vavar koova kamal gar. Na-a. Man moukal i mensho te vell.

⁶ Tou dikeh gar lačes ap i firhende, hoy rhačran le touke, te vell lengri doosh lendar krik lino.

⁷ Koy penom: Dik, mo Devel, kate hom, te krap, hoy tou mandar kameh, yaake har vas mandar glan i rah tsiro an o Debleskro lab činlo.

⁸ Ninna te hi činlo an o Moseskre lila, te marenn le firhen o Debleske, penas o Yezous Kristo: Tou, mo Devel, kamal gar, te anenn le touke marede firhen oun vavar koova, vitar kek firhen, hoy yon touke rhačrenna, te less tou lengri doosh lendar. Tou dikeh gar lačes ap kova.

⁹ Palle penas yob: Dik, me vau, te krap, hoy tou kameh. Kanna dikah: Har o Yezous Kristo vas, te dell lo pes o Debleske, koy vas ko phouro drom bouder či moldo.

O Yezouseskro rat lell i doosh i menshendar krik

¹⁰ Har o Yezous Kristo ap o troushel menge meras, kras lo kova, hoy o Devel kamas. Oun mari doosh las lo yek kopo hako tsireske mendar, oun yob kras men yaake djoudjo oun erligo glan o Debleste.

¹¹ Hako rashay krell hako dives peskri boudi, oun marell boud kope firhen o Debleske. Kal firhe nay lenn gar i doosh i menshendar.

^12-13 O Yezous Kristo das pes yek kopo an o merepen, te lell lo i doosh i menshendar krik, oun beshas pes hako tsireske ap o Debleskri čači rig. Kote dikell lo ap ko dives, kay venn kolla tel leskre pire čiddo, kay kaman les gar.

¹⁴ Yek kopo meras o Yezous Kristo kolenge, kay venna pash o Debleste, oun kras len hako tsiro čačo oun erligo glan leste.

¹⁵ Ninna o Debleskro Dourho penell menge kova. An o Debleskro lab hi činlo:

¹⁶ Ap ko tsiro, hoy vella, penell o Devel, sikrau me i menshende i nevo drom, har nay venn le pash mande: Me čivau miro čačepen an lengre shere oun činau mire laba an lengre djia.

¹⁷ Oun me bistrau lengri doosh. Oun lengro čilačepen vell bouder gar an miro shero.

¹⁸ Kote, kay o Devel i doosh krik las, kote hounte merell kek firho bouder gar, te lell lo i doosh krik.

¹⁹ Mire phrala, shounenn! Har o Yezous Kristo menge meras, oun peskro rat ratas, kras lo menge i voudar pre, te nay vah glan o Debleste. Men hounte vell bouder kek traash.

²⁰ Har o Yezous Kristo peskro djipen an o merepen das, his kova yaake, har te krals lo menge ko voudar dran kouč pesso than pre, hoy hi glan o Debleskri kouč isema. Yaake kras lo menge i nevo drom, hoy anell men an o djipen o Debleha.

²¹ Men hi i baro rashay. Kova hi i tsele patslenge koy.

²² Leskro rat thovas mari doosh mendar, oun kras mare djia djoudjo. Oun mer vam an o djoudjo pani tele thodo. Doleske djas kanna o lačo oun čačo djiyeha glan o Debleste an i zorelo patsepen!

²³ Mer nay patsah o Debles, te krell lo kova, hoy yob penas. Yob rikrell peskro lab. Doleske rikras zoreles maro patsepen ap leste!

Ma moukenn o Debleskro drom!

²⁴ Das yak yek ap o vavareste, te kamell yek o vavares o djiyestar, oun te krell hakeno lačo koova!

²⁵ Das yak, te ačas gar krik, te venn i patsle khetne. Hi save mashkral i patslende, kay venn bouder gar khetne. Kova hi gar mishto. T'mer dikenna, te hi o dives gar dour, kay vell o ray Yezous pale. Doleske djan kote, kay venn i patsle khetne, te krell yek o vavares zoreles an o dji.

²⁶ Te kamell yek ap i čilačo drom te djal, oun krell kova ninna, ninna te prindjrell lo o čačepen, koleske hi bouder kek koy, kay nay merals, te lell lo leskri doosh krik.

²⁷ Na-a, yob hounte trashell ko dives, kay vell o Debleskri rholi pral i phoub oun i zoreli yag pral kolende, kay kaman lestar či te djinell.

²⁸ An o phouro tsiro his yaake: Ko mensho hounte meras, kay djivas gar yaake, har an o Moseskre lila činlo hi. Te dikan douy, triin menshe ko čilačo koova, hoy ko mensho kras, hounte meras yob. Oun kekes hounte khaytas yob.

²⁹ Te his kova yaake koleha, kay kras gar, hoy o Mose penas, kitse zorleder vell o Debleskri rholi pral koleste, kay o Debleskro čaves pestar stakrella, oun krella, har te vals o Yezous Kristeskro rat či moldo. Oun kava rat lals peskri doosh krik, oun krals les erligo glan o Debleste. O Debleskro Dourho his leske lačes, oun yob doukras les.

³⁰ Mer djinah, kay o Devel penas: Me dau len ko čilačepen pale, hoy yon kran. Miri rholi vell ap lende. Oun pale hi činlo: O Devel rakrell o čačepen pral peskre menshende vin.

³¹ Havi bari phagi vell pral kolende, ap lende o djido Devel rhoyedo hi!

³² Ma bistrenn ko tsiro, kay o Debleskro kamlepen har i momeli an t'mare djia vas! Ap ko tsiro kran i menshe t'menge o djipen phares. Oun t'mer lan boud douka ap t'mende, oun vitsran t'maro patsepen gar ap i rig.

³³ Boud t'mendar van glan lauterende praasedo oun dino. I vavar t'mendar van ap i rig kolendar, kay praasedo oun dino van.

³⁴ T'mer rovan kolentsa, kay an o stilepen hi. Kolla, kay gar patslo his, lan t'mendar kova krik, hoy t'maro his. Oun i barhtelo djiyeha moukan t'mer len kova te krell. T'mer djinan, kay hi t'men i feteder bravlepen an o bolepen, hoy kek nay lell t'mendar.

³⁵ Doleske penau t'menge: Ma vitsrenn t'maro patsepen t'mendar! T'mer djinenn, havi barht lell kova, kay ap o Debleste rikrella.

³⁶ T'mer hounte venn gar khino an t'mare djia, te krenn kova lauter, hoy o Devel kamella! Palle dell lo t'men peskro bravlepen yaake, har yob penas.

^37-38 An o Debleskro lab hi činlo: Ko tsiro vella sik, kay vell kova, kay hounte vella. Yob moukell pes gar ap o drom pale te rikrell. O Devel penas: Koon ap mande patsella, kova hi čačo glan mire yaka. Oun yob lell o djipen. Koon miro drom moukella, ap koleste dikau gar lačes.

³⁹ Čačepah, mer ham gar kolendar, kay moukenn leskro drom oun djan nashedo. Na-a. Mer ham kolendar, kay ačah an o patsepen, oun lah o djipen, hoy gar pre-herella.