Haggai 1 - O Debleskro Lab 2024 (Sinte-Manouche)

Boudrenn ap o Debleskro kheer!

¹ An o douyto bersh, har o Darius o baro ray his, ap o ersto dives an o shobto čon, penas o baro Devel laba ap peskro rakepaskro, o Haggay, te penell yob kal laba doureder ap o Zorobabel, koleskro dad o Shealtiel his, oun ap o Yeshoua, koleskro dad o Yozadak his. O Zorobabel his o pralstouno pral o them Youda, oun o Yeshoua his o baro rashay.

² O Haggay penas: Kova penell o baro Devel, ko ray pral o bolepen oun i phoub: Kal menshe penenn: O tsiro hi gomme gar kay, te boudras ap o kheer maro baro Deblestar.

³ Koy pre penell o baro Devel:

⁴ Hi ko tsiro kay, te beshenn t'mer an shoukar kerde khera, oun miro kheer hi paash dino oun čiddo an kotya?

⁵ Doleske penell o baro Devel, ko ray pral o bolepen oun i phoub: Denn garda har t'menge djala:

⁶ T'mer boudrenna ap t'mari phoub, oun anenn gar boud dren. T'mer rhan oun venn gar čalo; t'mer piyenn oun t'mari troush ačella; t'mer rivenn t'men lačes an, oun t'menge vell gar tates. Oun kones love hi, kova čivell len an i possita, kay i rheb dren hi.

⁷ Kava penell o baro Devel, ko ray pral o bolepen oun i phoub: Hayvenn, hoske t'menge yaake djala!

⁸ Djan ap i berge oun lenn kasht, oun krenn miro kheer shoukar! Kova hi mange mishto, oun yaake vau sharedo, penell o baro Devel.

⁹ T'mer kamenn boud, oun gar boud hi, hoy lenn t'mer. Oun te kamenn kova khere te anell, lau les t'mendar. Hoske kova? penell o baro Devel, ko ray pral o bolepen oun i phoub. Miro kheer hi paash dino oun čiddo an kotya. Oun hakeno t'mendar dikell kokres ap peskro kheer.

¹⁰ Doleske vell dran o bolepen kek pani, oun dran i phoub vell kek zenlepen.

¹¹ Doleske penom, te vell kek brishin pral t'maro them, pral i berge, pral o them, kay o djob, i drake oun i djeteskre rouka bares venna, oun pral halauter, hoy dran i phoub vell, ninna pral i menshende oun i firhende. Kova, hoy t'mare vastentsa krenn, djal t'menge bouder gar mishto.

¹² Oun o pralstouno, o Zorobabel, koleskro dad o Shealtiel his, oun o baro rashay, o Yeshoua, koleskro dad o Yozadak his, kolla shounan kol laba. Ninna shounan len kol tsele menshe, kay his gar pandles krik anlo. Kol laba penas lenge o Debleskro rakepaskro, o Haggay, koles lengro baro Devel pash lende bičras. Oun i menshe lan kol laba an o dji, oun trashan o baro Deblestar.

¹³ Kote penas o Debleskro rakepaskro, o Haggay, koles o baro Devel bičras, te anell lo kol laba o baro Deblestar i menshenge an o tselo them: Me hom t'mentsa, penell o baro Devel.

¹⁴ Oun o baro Devel čivas lenge an o dji, te boudrenn le ap o baro Debleskro kheer. Oun yaake vas o Zorobabel, ko pralstouno pral o them Youda, koleskro dad o Shealtiel his, oun o Yeshoua, ko rashay, koleskro dad o Yozadak his, oun kol tsele menshe, kay gar pandles krik anlo van, te boudrenn le ap o kheer o baro Deblestar, ko rayestar pral o bolepen oun i phoub.

¹⁵ Kova his ap o 24. (biish-te-starto) dives an o shobto čon an o douyto bersh, har o Darius o baro ray his.